«ԱԼԻՔ» – Սիոնիստական ռեժիմի դէմ պատերազմի նահատակների 40-օրեակի առիթով, Իսլ. յեղափոխութեան առաջնորդ այաթ. Սէյէդ Ալի Խամենէին Իրանի ժողովրդին ուղերձ է յղել, որում մատնանշել է եօթ ռազմավարական առաջադրանքներ, որոնք ուրւագծում են ապագայի համազգային գործողութիւնների ուղղութիւնը:
Իսլ. յեղափոխութեան առաջնորդն անդրադառնալով 12-օրեայ պատերազմի ընթացքում մի շարք բարձրաստիճան զինւորականների, միջուկային գիտնականների եւ քաղաքացիների նահատակութեանը՝ ասել է. «Անշուշտ, այնպիսի հրամանատարների կորուստը, ինչպիսիք են նահատակներ Բաղերին, Սալամին, Ռաշիդը, Հաջիզադէն, Շադմանին, ինչպէս նաեւ այնպիսի գիտնականների, ինչպիսիք են նահատակներ Թեհրանչին եւ Աբբասին, ծանր կորուստ է իւրաքանչիւր ազգի համար։ Բայց յիմար եւ կարճատես թշնամին չհասաւ իր նպատակին: Ապագան ցոյց կը տայ, որ թէ՛ ռազմական, թէ՛ գիտական աշխատանքները յաւելեալ թափով կը շարժւեն դէպի նոր հորիզոններ, քան անցեալում»:
Իր ուղերձում, այաթ. Խամենէին մատնանշել է նաեւ եօթ ռազմավարական առաջադրանքներ, որոնք ուրւագծում են ապագայի համազգային գործողութիւնների ուղղութիւնը.
– Ազգային միասնութեան պահպանումը իւրքանչիւրի պարտականութիւնն է:
– Գիտատեխնիկական բոլոր ոլորտներում, առաջընթացի անհրաժեշտ թափի ապահովումը գիտական վերնախաւի պարտականութիւնն է:
– Երկրի եւ ազգի պատւի եւ արժանապատւութեան պաշտպանելը բոլոր հռետորների եւ գրչի մշակների առաջնային պարտականութիւնն է:
– Երկրի ազգային անվտանգութիւնն ու անկախութիւնը պաշտպանելու նպատակով, արդիական ռազմական միջոցների ապահովումը զինւորական հրամանատարութեան պարտականութիւնն է:
– Երկրի օրակարգային խնդիրների լուծմանն ուղղւած հետեւողական եւ նպատակային աշխատանքը բոլոր գործադիր մարմինների պարտականութիւնն է:
– Ժողովրդի բարոյական առաջնորդութիւնը, նրանց հոգեւոր անդորրի ապահովումը հոգեւորականութեան պարտականութիւնն է:
– Յեղափոխական ոգու եւ գիտակցութեան պահպանելը իւրաքանչիւրի, մասնաւորապէս՝ երիտասարդութեան պարտականութիւնն է:
