Գարեգին Բ. «Հաւատում ենք, որ արդարութիւնը պիտի յաղթանակի, թոյլ չպիտի տանք, որ եղբայրատեացութիւնը գերակայի»

«ԱԼԻՔ» – Յուլիսի 29-ին, ուխտաւորաբար Մայր Աթոռ Սուրբ Էջմիածին այցելել են Հայ Մարմնակրթական Ընդհանուր Միութեան (ՀՄԸՄ) 12-րդ մարզախաղերի շուրջ 700 սկաուտներ՝ ուղեկցութեամբ Կենտրոնական վարչութեան անդամների։ Այս մասին տեղեկացնում է Մայր Աթոռ Սուրբ Էջմիածնի մամլոյ ծառայութիւնը:

Այս առիթով Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսի հանդիսապետութեամբ Միածնաէջ Մայր Տաճարում կատարւել է մարզախաղերի մասնակիցների օրհնութեան կարգ։

Արարողութեան աւարտին Նորին Սրբութիւնն իր հայրական պատգամն ու բարեմաղթանքներն է բերել հայորդիներին՝ գոհունակութիւն յայտնելով, որ աւանդական դարձած մարզախաղերի առիթով աշխարհի տարբեր կողմերից համախմբւել են հայրենիքում՝ մրցապայքարում դրսեւորելու իրենց հմտութիւններն ու կարողութիւնները, միաժամանակ ճանաչելու եւ բարեկամանալու միմեանց հետ։

«Խիստ կարեւոր է երիտասարդներիդ մասնակցութիւնը նման վարժանքներին ու մրցոյթներին, որոնք միջոց են զօրանալու մարմնով եւ հետեւողական աշխատանքով, տոկունութեամբ ու ոգու ամրութեամբ արձանագրելու ապագայ յաղթանակներ։

Վարժանքներն ու մրցոյթները միջոց են նաեւ զօրանալու հոգով՝ Աստծուն ապաւինած դիմակայելու բոլոր փորձութիւններին ու դժւարութիւններին եւ աննկուն ընթանալու դէպի յաղթութիւն։

Ուստի, պարբերաբար կազմակերպւող նման միջոցառումները իրենց նշանակութեամբ եւ առաքելութեամբ աւելին են, քան սոսկ մարզական մրցոյթներ»,- նշել է Հայոց Հայրապետը։

Անդրադառնալով հայ ժողովրդի եւ հայրենիքի առջեւ ծառացած բազմաթիւ դժւարութիւններին ու խնդիրներին՝ Նորին Սրբութիւնն ընդգծել է, որ Արցախեան պատերազմի հետեւանքով հայրենի երկիրը տակաւին դիմագրաւում է լրջագոյն անվտանգային մարտահրաւէրներ, կարիքի մէջ է տեղահանւած արցախահայութիւնը, ներհասարակական կեանքում խորանում են անհամերաշխութիւնն ու անհանդուրժողութիւնը, գերակշռող են եւ խորապէս անհանգստացնող ապագայի անորոշութեան զգացումները։

«Հաւատում ենք, որ արդարութիւնը պիտի յաղթանակի, եւ համախումբ ջանքերով պիտի թոյլ չտանք, որ մեր կեանքում գերակայեն եղբայրատեացութիւնը, կեղծիքն ու չարագործութիւնները եւ խաթարւի ազգային միասնականութիւնը։ Հայրենիքի համար այս բարդագոյն իրավիճակում անգամ պէտք չէ յուսահատւել եւ հիասթափութիւն ապրել։ Դուք, որ ծնւել ու հասակ էք առել աշխարհի տարբեր երկրներում, ինչպէս եւ Հայաստանում ու Արցախում, պատասխանատւութիւն ունէք մեր ժողովրդի լուսեղէն գալիքի կերտման գործում՝ ձեր ուժերն ու կարողութիւնները ծառայեցնելու ի սէր ազգի ու հայրենիքի։

Նաեւ դուք առաքելութիւն ունէք ազգային միաբանութիւնն ամրապնդելու, Հայաստան-Սփիւռք կապերն անսասան պահպանելու եւ նորովի արդիւնաւորելու։ Այս յանձնառութեան բարեյաջող իրագործման համար առանձնակի կարեւոր են ձեր հայրենաճանաչութիւնը, ազգային ինքնագիտակցութիւնը, հայոց պետականութեան ամրապնդման կամքն ու վճռականութիւնը եւ դարերով նւիրագործւած մեր արժեհամակարգի անխաթար պահպանումը։ Դուք ապագան էք մեր հայրենիքի ու ազգի եւ երաշխիքը հայոց յարատեւութեան, համընդհանուր մեր իղձերի ու երազանքների իրականացման։

Ձեր այցը հայրենիք կարեւոր քաջալերանք է հայրենաբնակ մեր ժողովրդի, ձեզ հասակակից ձեր քոյրերի ու եղբայրների համար»,- ասել է Հայոց Հովւապետը՝ յորդորելով երիտասարդ սկաուտներին իրենց հոգում մշտավառ պահել հայրենեաց սէրը, ուժ առնել հարազատ հողից եւ բազմադարեայ սրբութիւններից ու ներշնչւել մեր հայրերի հաւատաշէն գործերից, հաւատարիմ մնալ ազգային-հոգեւոր արժէքներին, զօրացնել իրենց սրտերում որդիական նւիրումն առ հայրենին, Սուրբ Եկեղեցին եւ Մայր Աթոռ Սուրբ Էջմիածինը։

Իր խօսքում Նորին Սրբութիւնը պատգամել է ուխատւորներին նաեւ անխախտ պահել իրենց ազգային ինքնութիւնը, հպարտանալ Հայոց պատմութեամբ, նախնեաց կերտած ժառանգութեամբ եւ յանուն արդարութեան, յանուն անկախ կեանքի հայ ժողովրդի մղած անդուլ պայքարի հզօր ոգով։

«Միշտ արիասիրտ կանգնէք ի պաշտպանութիւն մեր ժողովրդի իրաւունքների եւ նրա արդար դատի։ Հայաստանում ձեր մէկտեղումի այս նշանակալի եւ անմոռանալի օրերը թող դառնան առիթ ոգեշնչումի ու յանձնառութեան՝ ձեր գիտելիքներով ու շնորհներով բոլորանւէր օգտակար ծառայութիւն բերելու ազգային կեանքում եւ նորանոր յաջողութիւններ արձանագրելու՝ ի շահ մեր ժողովրդի եւ հայրենիքի»,-յորդորել է Ամենայն Հայոց Հայրապետը՝ իր գնահատանքը բերելով մարզախաղերի կազմակերպիչներին եւ բոլոր պատասխանատուներին իրենց նւիրեալ եւ ազգօգուտ ծառայութեան համար:

Վերջում Նորին Սրբութիւնը հայցել է Երկնաւոր Տիրոջը, որպէսզի հայորդիները ապրեն առողջ ու երջանիկ, լինեն արժանաւոր զաւակները մեր հայրերի եւ իրագործեն նրանց նւիրական տեսիլքներն ու երազանքները։