«ԱԼԻՔ»- Հանրապետութեան նախագահ Մասուդ Փեզեշքիանը դոկտ. Ալի Լարիջանիին նշանակել է Ազգային Անվտանգութեան Գերագոյն խորհրդի քարտուղար:
Մինչ այդ այս պաշտօնը զբաղեցնում էր Ալի Աքբար Ահմադիանը, որը կարող է շուտով տեղափոխւել կառավարութիւն: Ինչպէս հաղորդում է «Թասնիմ» լրատւական գործակալութիւնը՝ նրա համար նախատեսւած է յատուկ յանձնարարութիւնների գծով փոխնախագահի նոր պաշտօնը:
«Թասնիմ»-ը նաեւ տեղեկացրել է, որ դոկտ. Լարիջանին մօտ ապագայում կը դառնայ նաեւ Իսլ. յեղափոխութեան առաջնորդի երկու ներկայացուցիչներից մէկն Ազգային Անվտանգութեան Գերագոյն խորհրդում: Ներկայում այաթ. Խամենէիին խորհրդում ներկայացնում են Ալի Աքբար Ահմադիանը եւ Սայիդ Ջալիլին: Հաշւի առնելով վերջին փոփոխութիւնը, կարելի է ենթադրել, որ Իսլ. յեղափոխութեան առաջնորդի ներկայացուցչի հանգամանքում Լարիջանին նոյնպէս կը փոխարինի Ահմադիանին:
Նշենք, որ դոկտ. Ալի Լարիջանին Իսլամական Հանրապետութեան քաղաքական դաշտի հնաբնակներից է, որն աչքի է ընկնում իր չափաւորական քաղաքական հայեացքներով եւ պրագմատիկ մօտեցումներով: Նա վերջին չորս տասնամեակների ընթացքում առանցքային պաշտօններ է զբաղեցրել համակարգում:
Նա Իսլ. յեղափոխութեան պահապանների կորպուսի ձեւաւորման առաջին տարիներին միացել է այս կառոյցին, եւ զբաղեցրել է այնպիսի պաշտօններ, ինչպիսիք են՝ ԻՅՊԿ-ի փոխհրամանատարի եւ շտաբի պետի տեղակալի պաշտօնները:
1992-1994 թթ. Հաշեմի Ռաֆսանջանիի երկրորդ կառավարութեան կազմում զբաղեցրել է Մշակոյթի եւ իսլամական լուսաւորութեան նախարարի պաշտօնը:
1994-2004 թթ Իսլ. յեղափոխութեան առաջնորդի հրամանով ղեկավարել է Իրանի ռադիօհեռուստատեսութիւնը:
2005-2007 թթ. զբաղեցրել է Ազգային Անվտանգութեան Գերագոյն խորհրդի քարտուղարի պաշտօնը
2008-2020 թթ. զբաղեցրել է Իսլ. խորհրդարանի նախագահի պաշտօնը:
2020 թւականից սկսեալ Իսլ. յեղափոխութեան առաջնորդի խորհրդականն է, եւ նրա հրամանով անդամակցում է Համակարգի նպատակայարմարութիւնը բնորոշող ժողովի կազմին:
