Սփիւռքի թեմակալ առաջնորդներն մտահոգութիւն են յայտնել Միքայէլ եւ Բագրատ սրբազանների կալանքի երկարաձգման կապակցութեամբ
«ԱԼԻՔ» – Հայ Առաքելական Եկեղեցու Սփիւռքի թեմակալ առաջնորդներն ու հայրապետական պատւիրակները խոր մտահոգութիւն են յայտնում Միքայէլ արքեպիսկոպոս Աջապահեանի եւ Բագրատ արքեպիսկոպոս Գալստանեանի կալանքը երկարացնելու առնչութեամբ.: Այս մասին ըստ News.am-ի՝ ասւում է նրանց հրապարակած համատեղ յայտարարութեան մէջ:
«Մենք՝ Սփիւռքի թեմակալ առաջնորդներս եւ հայրապետական պատւիրակներս, մեր խոր մտահոգութիւնն ենք յայտնում՝ Միքայէլ արքեպիսկոպոս Աջապահեանի եւ Բագրատ արքեպիսկոպոս Գալստանեանի՝ անազատութեան մէջ մնալու առնչութեամբ։
Մեր հաւատացեալ ժողովրդի, Հայաստանեաց Առաքելական Եկեղեցու եւ մեր հոգեւոր դասի համար անսովոր եւ սրտաբեկիչ երեւոյթ է երկու բարձրաստիճան հոգեւորականների ազատազրկումը Հայաստանի Հանրապետութեան դատական համակարգի կողմից:
Մենք համարում ենք, որ նրանց նկատմամբ կալանքի ձեւով խափանման միջոցի կիրառումը կարող է փոխարինւել ազատութեան մէջ մնալու այլընտրանքային միջոցներով մինչեւ դատական արդար վճռի իրականացումը։
Մեր սպասումն ու ջերմ փափագն է, որ երկու արքեպիսկոպոսների դատավարութիւնները իրականացւեն բաց եւ թափանցիկ, բացառապէս օրէնքի եւ իրաւունքի գերակայութեան հիման վրայ՝ ապահովելով բոլոր կողմերի իրաւունքների հաւասար պաշտպանութիւնը։
Մենք շարունակում ենք աղօթել մեր հոգեւոր եղբայրների առողջութեան եւ բարօրութեան համար եւ լիայոյս ենք, որ օրինական ու արդար դատավարութեան արդիւնքում նրանք կարդարացւեն եւ կը վերականգնւեն իրենց ամբողջական իրաւունքները։
Հայաստանեայց Առաքելական Սուրբ Եկեղեցու Սփիւռքի թեմակալ առաջնորդներ եւ հայրապետական պատւիրակներ»,- ասւած է հրապարակւած յայտարարութեան մէջ:
