Փեզեշքիան. «Թեհրանը եւ Մինսկը լուրջ համագործակցութեան միջոցով կարող են արդիւնաւէտօրէն հակազդել պատժամիջոցներին եւ մարտահրաւէրներին»
«ԱԼԻՔ» – Բելառուս կատարած պաշտօնական այցի շրջանակում, Հանրապետութեան նախագահ Մասուդ Փեզեշքիանը երէկ՝ օգոստոսի 20-ին հանդիպել է այդ երկրի նախագահ Ալեքսանդր Լուկաշենկոյի հետ: Փոխանցում է ԻՌՆԱ-ն:
Հանդիպման ժամանակ նախագահ Փեզեշքիանը քննադատել է ԱՄՆ-ի եւ որոշ եւրոպական երկրների կողմից առաջ մղւող միակողմանի մօտեցումը՝ յայտարարելով, որ նման մօտեցումն անհանդուրժելի է երկու երկրների համար։
Հանրապետութեան նախագահն ասել է, որ Արեւմտեան երկրները՝ ԱՄՆ-ի գլխաւորութեամբ, ձգտում են իրենց օրակարգը թելադրել Իրանին եւ Բելառուսին։ Սակայն Թեհրանը եւ Մինսկը վստահ են, որ լուրջ համագործակցութեան միջոցով կարող են արդիւնաւէտօրէն հակազդել պատժամիջոցներին եւ մարտահրաւէրներին։
Բացի դրանից, նա գոհունակութիւն է յայտնել փոխադարձ շահերը քննարկելու եւ համատեղ ներուժի իրացումը արագացնելու հնարաւորութեան կապակցութեամբ։
Փեզեշքիանը շեշտել է երկու երկրների միջեւ բարեկամական երկկողմ յարաբերութիւնները՝ նշելով դրանց հետեւողականութիւնը տարածաշրջանային եւ միջազգային տարբեր հարցերի շուրջ։
Նախագահը յայտարարել է, որ երկու երկրներն էլ կառուցողականօրէն համագործակցում են միջազգային կազմակերպութիւնների, մասնաւորապէս՝ Եւրասիական տնտեսական միութեան, Շանհայի համագործակցութեան կազմակերպութեան եւ BRICS-ի շրջանակում, որոնք հիմք են ծառայում փոխգործակցութեան ընդլայնման համար։ Նա նշել է նաեւ Իրանի եւ Բելառուսի միջեւ տեսակէտների լայն ընդհանրութիւնը, որը նրա համոզմամբ՝ ամուր հիմք է ստեղծում համաձայնագրերի լիարժէք իրականացման եւ տարածաշրջանային ու միջազգային ասպարէզներում լուրջ համագործակցութեան զարգացման համար։
Ի պատասխան՝ Բելառուսի նախագահ Ալեքսանդր Լուկաշենկօն ողջունելով նախագահ Փեզեշքիանին՝ պատրաստակամութիւն է յայտնել ընդլայնել համագործակցութիւնը բարեկամութեան ոգով եւ վստահեցրել է, որ համաձայնութիւնների հասնելու ցանկացած հնարաւոր խոչընդոտ կարող է վերացւել։
Նա միաժամանակ յիշեցրել է Թեհրան կատարած իր այցը, Իսլ. յեղափոխութեան առաջնորդի հետ հանդիպումը, եւ նախագահ Փեզեշքիանին խնդրել իր լաւագոյն մաղթանքները փոխանցել այաթ. Խամենէիին։ Լուկաշենկօն վստահութիւն է յայտնել նաեւ, որ Իրանի եւ Բելառուսի միջեւ համագործակցութեան ընդլայնման համար որեւէ խոչընդոտ չկայ՝ խրախուսելով փոխադարձ հետաքրքրութիւն ներկայացնող բոլոր ոլորտների շուրջ քննարկումները՝ նրանց յարաբերութիւնները բարձրագոյն մակարդակի բարձրացնելու համար։
Նշենք, որ այցի արդիւնքում երկու երկրները տարբեր ոլորտներում համագործակցութեան վերաբերեալ 12 փաստաթուղթ են ստորագրել:
Հանրապետութեան նախագահը երէկ՝ ուշ երեկոյեան Թեհրան է վերադարձել:
