Արաղչի. «Իրանն ու ԱՄՆ-ն դեռ չեն հասել այն մակարդակին, որը թոյլ կը տայ արդիւնաւէտ բանակցել»
«ԱԼԻՔ» – «ԱՄՆ-ի հետ բանակցութիւնները պէտք է տեղի ունենան ճիշտ ժամանակին։ Իւրաքանչիւր բանակցութիւն ունի իր յատուկ ժամանակը` «բանակցութիւնների հասունացման ժամանակը»»: Այս մասին ԻՌՆԱ-ին տւած հարցազրոյցում յայտարարել է ԱԳ նախարար Սէյէդ Աբբաս Արաղչին՝ ընդգծելով, որ ԱՄՆ-ի հետ բանակցութիւնների ժամանակը դեռ չի եկել:
«Իմ կարծիքով՝ մենք դեռ չենք հասել այն հասունութեան մակարդակին, որը թոյլ կը տայ արդիւնաւէտ բանակցութիւն ԱՄՆ-ի հետ։ Ամերիկացիներն էլ դեռ չեն հասել այն կէտին, որպէսզի իրականցնեն հաւասար բանակցութիւն։ Եւ եթէ նրանք ցանկանում են բանակցել, որպէսզի բանակցային սեղանի շուրջ ստանան այն, ինչ չեն կարողացել ձեռք բերել ռազմական դաշտում, դա նրանց չի յաջողւի։ Ես չեմ մտնի այնպիսի բանակցութիւնների մէջ, որոնք կանտեսեն Իրանի ժողովրդի իրաւունքները»,- յստակեցրել է Արաղչին:
Նա նաեւ յայտարարել է Ատոմային էներգիայի միջազգային գործակալութեան (ՄԱԳԱՏԷ) հետ բանակցութիւնների հերթական փուլի համար Վիեննա իրանական պատւիրակութիւն ուղարկելու հնարաւորութեան մասին:
Աւելի մանրամասնելով ՄԱԳԱՏԷ-ի գլխաւոր տնօրէնի տեղակալ եւ անվտանգութեան ապահովման վարչութեան ղեկավար Մասիմօ Ապարովի Թեհրան կատարած այցի արդիւնքները՝ Արաղչին նշել է, որ իր կարծիքով՝ Ապարովի Իրան կատարած այցն օգտակար էր Թեհրանի համար՝ միջուկային խնդիրն աւելի լաւ ըմբռնելու առումով։
«Այդ ուղեւորութիւնից յետոյ մենք գրեցինք եւ ներկայացրեցինք մեր տեսակէտները խորհրդարանի օրէնքի հիման վրայ հնարաւոր ճանապարհի վերաբերեալ։ Շաբաթ օրը ՄԱԳԱՏԷ-ն պատրաստեց իր մեկնաբանութիւնները եւ ուղարկեց դրանք մեզ, եւ Իրանի եւ գործակալութեան միջեւ այս փոխշահաւէտ փոխգործակցութիւնը շարունակւում է։ Մենք, հաւանաբար, գործընկերներ կուղարկենք Վիեննա՝ այնտեղ բանակցութիւնների հերթական փուլի համար»,- ասել է ԱԳ նախարարը:
