Արթուր Խաչատրեան. «Փաշինեանը գիտակցաբար չկանխեց պատերազմը»
«ԱԼԻՔ» – ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Արթուր Խաչատրեանն արձագանքել է օգոստոսի 23-ին Նիկոլ Փաշինեանի յայտարարութեանը՝ նշելով, որ նա գիտակցաբար չի կանխել Արացխի 44-օրեայ պատերազմը: Այս մասին նա գրել է ֆէյսբուքի իր էջում:
«Փաշինեանն առաւօտեան յայտարարեց, որ ինքը մինչեւ 2020 թւականի սեպտեմբեր գիտակցաբար չգնաց զիջումների, քանի որ «այդ զիջումների արդիւնքում մեր ունեցած բոլոր սպառնալիքները եւ կախւածութիւնները մեծանալու էին, մեծանալու էին անհամաչափօրէն՝ հանգեցնելով Հայաստանի անկախութեան եւ պետականութեան կորստի»:
Այսինքն՝ ինքը գիտակցաբար չկանխեց պատերազմը, որի արդիւնքում մենք հազարաւոր զոհեր ունեցանք, կորցրեցինք Արցախի Հանրապետութիւնը, կորցրեցինք ՀՀ տարածքի մի հատւած ու Ադրբեջանին միջանցք խոստացանք…
Փաստօրէն, ըստ Փաշինեանի, «Հայաստանի անկախութիւնը պահպանելու եւ այդ անկախութիւնն իրական դարձնելու» միակ տարբերակը պատերազմն, աւերն ու հազարաւոր մարդկային կեանքերն էին։ Հայաստանը պէտք է պարտւէր, որ Ադրբեջանի ու Թուրքիայի հետ յարաբերութիւնները «կարգաւորէր»։ Արդեօք սա չի նշանակո՞ւմ, որ Փաշինեանը կանխամտածւած երկիրը տարաւ պատերազմի ու պարտութեան եւ իր նախապատերազմական ագրեսիւ քաղաքականութիւնը «պարտութեամբ դէպի կարգաւորում» նպատակ չէր հետապնդում»,- գրել է նա:
