Արաղչի. «ՄԱԳԱՏԷ-ի տեսուչների մուտքը Իրան տեղի է ունեցել Բուշեհրի ատոմակայանում վառելիքի փոխարինումը վերահսկելու համար՝ ԱԱԳԽ որոշմամբ»
«ԱԼԻՔ» – ՄԱԳԱՏԷ-ի տեսուչների մուտքը Իրան տեղի է ունեցել Բուշեհրի ատոմակայանում վառելիքի փոխարինումը վերահսկելու համար՝ Ազգային անվտանգութեան գերագոյն խորհրդի որոշմամբ: Այս մասին, երէկ՝ օգոստոսի 27-ին Իսլ. խորհրդարանի Ազգային անվտանգութեան եւ արտաքին քաղաքականութեան յանձնաժողովի նիստում յայտարարել է ԱԳ նախարար Սէյէդ Աբբաս Արաղչին:
«Իսլ. խորհրդարանի ընդունած օրէնքը ՄԱԳԱՏԷ-ի հետ համագործակցութիւնը պայմանաւորել է Ազգային անվտանգութեան գերագոյն խորհրդի որոշմամբ: Հետեւաբար, օրէնքի համաձայն, Գործակալութեան բոլոր պահանջները ուղարկւում են Ազգային անվտանգութեան գերագոյն խորհրդին որոշում կայացնելու համար:
Այժմ որոշում է ընդունւել Բուշեհրի ատոմակայանի վառելիքի փոխարինման վերաբերեալ, որը պէտք է իրականացւի ՄԱԳԱՏԷ-ի տեսուչների հսկողութեան ներքոյ: Որեւէ տեսակի համագործակցութիւն (ՄԱԳԱՏԷ-ի հետ-ԽՄԲ.) կը լինի խորհրդարանական օրէնքի շրջանակներում, եւ կը ծառայի Իրանի ժողովրդի շահերի ամրագրմանը»,- յայտարարել է Արաղչին:
ԱԳ նախարարը նաեւ պարզաբանումներ է ներկայցրել երէկւայ խորհրդարանի նիստի ընթացքում Թեհրանի պատգամաւորներից մէկի՝ նոր ձեւաչափով Իրանի եւ Գործակալութեան միջեւ համագործակցութեան համաձայնագրի տեքստի վերջնական մշակման մասին յայտարարութեան վերաբերեալ. «Տեքստը դեռեւս վերջնականապէս հաստատւած չէ. երկու կողմերի միջեւ որոշ կարծիքներ են փոխանակւել, եւ Գործակալութեան տեսակէտները մի քանի անգամ գրաւոր ներկայացւել են։ Գործընթացի ընթացքում բնական է, որ կողմերը փոխանակեն իրենց տեսակէտներն ու կարծիքները՝ բանակցութիւնների միջոցով վերջնական եզրակացութեան հասնելու համար։ Ես չգիտեմ, թէ որտեղից է ծագել յարգելի պատգամաւորի կողմից նշւած տեքստը, բայց պէտք է նշեմ, որ այս տեքստը բանակցութիւնների կամ համաձայնութեան ենթակայ տեքստ չէ»:
