Հայկ Դեմոյեան. «Պահանջում ենք ենթարկել քրէական պատասխանատւութեան»
«ԱԼԻՔ» – Հայոց Ցեղասպանութեան թանգարան-իստիտուտի նախկին տնօրէն, պատմաբան Հայկ Դեմոյեանը ֆէյսբուքեան իր էջում գրառում է կատարել՝ պահանջելով ՀՀ Կրթութեան, գիտութեան, մշակոյթի եւ սպորտի նախարար Ժաննա Ալեքսանեանի հրաժարակն ու նրան քրէական պատասխանատւութեան ենթարկելը:
«Ծիծեռնակաբերդ կատարած այսօրւայ (օգոստոսի 29-ԽՄԲ.) շրջայցի արդիւնքները ամփոփում ենք հետեւեալ տխուր եզրահանգումներով.
Ա. Հայոց Ցեղասպանութեան զոհերի յուշահամալիրի տարածքում շինարարական-վերանորոգման աշխատանքների անւան տակ յուշարձանին հասցւել է զգալի վնաս, կատարւել է պետական միջոցների օգտագործման անտրամաբանական ու քննութիւն չբռնող հաշւարկ, որի հիմքում լուրջ կոռուպցիոն ռիսկեր կան:
Բ. ԿԳՄՍ նախարարութիւնն ի դէմս նախարար Ժաննա Անդրէասեանի, անհրաժեշտ հետեւողականութիւն չի ցուցաբերել աշխատանքներն իրականացնող շինարարական ընկերութեան կողմից յուշարձանի կարգավիճակ ունեցող կառոյցի տարածքում համապատասխան որակի աշխատանքներ տանելու եւ որակեալ բանւորական ուժ օգտագործելու համար: Շինարարութեան մէջ ներգրաււած օտարազգի աշխատանքային միգրանտների ներգրաւմամբ իրականացւած քանդման ու ապամոնտաժման աշխատանքների արդիւնքում յուշահամալիրի մոյթերից 3-ը, տարածքի սալահատակը, դէպի յաւերժական կրակը տանող աստիճաններն անվերականգնելի վնաս է հասցւել:
Գ. 1966-67 թւականներին մոյթերի վրայ տեղադրւած երեսպատման բազալտէ քարերը վերածւել են խճազանգւածի, իսկ տարածք բերւած նոր շինաքարերի վրայ արդէն տեսանելի են մեխանիկական ներգործման ու վնասւածքի հետքեր, որոնք անհնար են դարձնում դրանց օգտագործումը:
Դ. Հայոց Ցեղասպանութեան զոհերի յուշահամալիրի հանդէպ ԿԳՄՍ նախարարութիւնը եւ անձամբ նախարար Ժաննա Անդրէասեանը ցուցաբերել են արհամարական վերաբերմունք ու յանցաւոր անփութութիւն, հետամուտ չլինելով տարւող աշխատանքների նկատմամբ վերահսկողութիւն սահմանելուն: Փոխարէնը, իրականացւած ոճրագործութեան հետեւանքների հետ ծանօթանալով, նախարար Ժ. Անդրէասեանը յայտարարում է մասնագիտական նոր յանձնախմբի ստեղծման նպատակայարմարութեան մասին, որը ոչ այլ ինչ է, եթէ ոչ յանցաւոր գործելաոճի եւ համայն հայութեան համար սրբավայր հանդիսացող Յուշահամալիրի հանդէպ կրաւորական ու նսեմացուցիչ վերաբերմունքի արտայայտութիւն:
Հաշւի առնելով վերոգրեալը, Հայոց Ցեղասպանութեան յուշահամալիրին հասցւած վնասը, ինչպէս նաեւ յանցաւոր անփութութեան ու դիտաւորութեան արդիւնքում Հայոց Ցեղասպանութեան զոհերի յիշատակը պղծելու նախարարի բացայայտ կեցւածքը,
ՊԱՀԱՆՋՈՒՄ ԵՆՔ
ԿԳՄՍ նախարար Ժաննա Անդրէասեանի հրաժարականը,
ՊԱՀԱՆՋՈՒՄ ԵՆՔ
Հետաքննել նախարար Ժաննա Անդրէասեանի գործունէութեան այս եւ միւս կոռուպցիոն ու յանցաւոր դրւագները եւ ՀՀ օրէնսդրութեան համաձայն ենթարկել քրէական պատասխանատւութեան»,- գրել է նա:
Նշենք, որ երէկ՝ օգոստոսի 29-ին, Հայկ Դեմոյեանը եւ մի խումբ ակտիւիստներ Ծիծեռնակաբերդի յուշահամալիրի դիմաց իրազեկման ակցիա են անց կացրել:
Մասնակիցները մտահոգութիւն են յայտնել վերանորոգման աշխատանքի քողի ներքոյ Ծիծեռնակաբերդի յուշահամալիրում կատարւող շինարարական աշխատանքների մասին: Նրանք նշել են, որ դէմ չեն վերանորոգմանը, բայց այն վերաբերում է մի քանի սալաքարերին՝ յուշահամալիրի ներսի հատւածում, որոնք հնարաւոր է փոխել չքանդելով ողջ յուշահամալիրը։
Ըստ նրանց՝ եթէ այդ աշխատանքները շարունակւեն, ապա յուշահամալիրը շուտով կը փակւի այցելուների համար, ինչը գործող իշխանութիւնները միտումնաւոր են անում՝ Հայոց Ցեղասպանութեան նկատմամբ իրենց պրօթուրքական մօտեցումների համատեքստում։
Նրանք նշել են, որ յուշահամալիրը վերանորուգում են հայերէնին չտիրապետող աշխատանքային միգրանտներ, որոնք անթուլատրելի աշխատանքային գործիքներով եւ ծանրտեխնիկայով վնասում են ողջ յուշահամալիրը:
«Եթէ շինարարութիւնը չկանգնեցնեն, ապա նոյն ձեւով քանդելու են յուշահամալիրը աշխատանքային միգրանտների միջոցով, որոնց համար Ցեղասպանութեան յուշահամալիրը սովորական քար է, որը հրամայւած է ջարդել»,- լրագրողների հետ զրոյցում նշել է Դեմոյեանը:
