Իսլ. խորհրդարանի պատգամաւորները դէմ են արտայայտւել «Զանգեզուրի միջանցք»-ին
«ԱԼԻՔ» – Իսլ. խորհրդարանի նախագահութեան անդամ Ահմադ Նադերին խորհրդարանի բաց նիստում կարդացել է աւելի քան 150 պատգամաւորի յայտարարութիւնը, որը վերաբերում էր Հարաւային Կովկասի տարածաշրջանի ռազմավարական նշանակութեանը եւ Իրանի հիւսիս-արեւմտեան սահմանների վերաբերեալ ռիսկային ծրագրերի դէմ պայքարին։ Այս մասին հաղորդում է «Թասնիմ»-ը:
Յայտարարութեան մէջ մասնաւորապէս նշւած է.
«Իսլամական խորհրդարանը, որպէս Իրանի մեծ ազգի ներկայացուցիչ, սահմանադրութեան եւ համակարգի ընդհանուր քաղաքականութեան շրջանակներում, ընդգծում է Հարաւային Կովկասի ռազմավարական դիրքը երկրի համար։ Այս տարածաշրջանը ոչ միայն աշխարհագրական սահման է, այլեւ Իրանի անվտանգութեան շրջագծի, ռազմավարական խորութեան եւ քաղաքակրթական ոլորտի մի մասը, որը դարեր շարունակ ամուր պատմական, մշակութային եւ անվտանգութեան կապեր է ունեցել Իրանի հետ եւ այսօր էլ շարունակում է կենսական դեր խաղալ տարածքային ամբողջականութեան եւ ազգային անվտանգութեան պահպանման գործում։
Իրանի Իսլամական Հանրապետութիւնը, հիմնւելով իր հաստատւած սկզբունքների վրայ, միշտ ձգտել է տարածաշրջանային խնդիրների լուծմանը տարածաշրջանի երկրների միջեւ ուղիղ երկխօսութեան միջոցով՝ ազատ տարածաշրջանային ուժերի միջամտութիւնից: Ճանաչւած սահմանները փոխելու, պարտադրւած միջանցքներ ստեղծելու կամ «Զանգեզուրի միջանցք»-ի նման ծրագրեր իրականացնելու ցանկացած գործողութիւն կը լինի տարածաշրջանի ազգերի շահերի հետ անհամատեղելի գործողութիւն եւ կոլեկտիւ անվտանգութեանը ուղղակի սպառնալիք:
Յղում անելով հաստատւած միջազգային սկզբունքներին՝ Իսլամական խորհրդարանը յիշեցնում է, որ միջազգայնօրէն ճանաչւած սահմանների ցանկացած փոփոխութիւն՝ առանց համապատասխան կառավարութիւնների համաձայնութեան, ՄԱԿ-ի կանոնադրութեան եւ երկրների տարածքային ամբողջականութեան սկզբունքի ակնյայտ խախտում է:
Իրանի Իսլամական Հանրապետութիւնը իրաւունք է վերապահում օգտագործել բոլոր քաղաքական, իրաւական եւ օրինական հնարաւորութիւնները վճռական պաշտպանութեան համար՝ ազգային անվտանգութեան եւ շահերի վրայ յարձակման դէպքում: Հարաւային Կովկասը կենսական նշանակութիւն ունի ոչ միայն անվտանգութեան նկատառումներից ելնելով, այլեւ որպէս Իրանի եւ տարածաշրջանի համար կարեւոր էներգետիկ, տարանցիկ եւ տնտեսական կապի միջանցք: Իրանի աշխարհատնտեսական դիրքը թուլացնելուն ուղղւած ցանկացած տնտեսական եւ տարանցիկ նախագիծ մերժւում է Իսլամական Խորհրդարանի տեսանկիւնից եւ անընդունելի է ազգի համար: Իրանը կարծում է, որ իրական զարգացումը տեղի կունենայ, երբ այն ներառի տարածաշրջանի բոլոր երկրների շահերը եւ իրականացւի նրանց ազգային ինքնիշխանութեան յարգանքով։
Իսլամական Խորհրդարանը զգուշացնում է, որ Կովկասեան տարածաշրջանում առաջիկայ զարգացումները կարող են ուղեկցւել որոշ տարածաշրջանային գործիչների կողմից իրականացւող սցենարներով՝ միջտարածաշրջանային տէրութիւններին գրգռելու համար։ Նման տարածաշրջանային կոալիցիաները ո՛չ տարածաշրջանի շահերից են բխում, ո՛չ էլ կարող են կայուն անվտանգութիւն ստեղծել։ Զգօնութիւնը, համախմբւածութիւնը եւ ակտիւ դիւանագիտութիւնը կը լինեն Իրանի հիմնական գործիքները՝ այս սպառնալիքներին հակազդելու համար։ Մենք կոչ ենք անում տարածաշրջանի բոլոր երկրներին պահպանել բարիդրացիութեան սկզբունքը, խուսափել լարւածութիւն ստեղծող գործողութիւններից եւ ընդլայնել տարածաշրջանային համագործակցութիւնը առանց օտարերկրացիների ներկայութեան։ Տնտեսական եւ տարանցիկ յարաբերութիւնների զարգացումը կայուն կը լինի միայն գոյութիւն ունեցող սահմանների շրջանակներում եւ փոխադարձ յարգանքի վրայ հիմնւած։
Իրանի Իսլամական Հանրապետութիւնը՝ պատւի, իմաստութեան եւ նպատակայարմարութեան երեք սկզբունքների վրայ հիմնւած ակտիւ դիւանագիտութեամբ, պատրաստ է օգնել Հարաւային Կովկասի տարածաշրջանի կարգաւորմանը՝ համագործակցելով բոլոր տարածաշրջանային կողմերի հետ։ Իրանցի ազգի ներկայացուցիչները կը պաշտպանեն ազգային շահերը՝ վերահսկելով արտաքին քաղաքականութեան իրականացումը եւ պահպանելով երկրի պատմական եւ անվտանգութեան իրաւունքները, եւ կարձագանքեն տարածաշրջանային տէրութեանը յարիր ցանկացած սպառնալիքի»:
