Լիլիթ Գալստեան. «Սա փափուկ ուժի գործադրմամբ, առանց պատերազմական գործողութիւնների հերթական կապիտուլիացիոն փաստաթուղթն է»
«ԱԼԻՔ» – Հայաստանի ԱԳ նախարարը նախանձելի երեսպաշտութեամբ խօսում էր ինձ համար եւ շատ շատերի համար, հազարների համար թւացեալ կամ չակերտաւոր խաղաղութեան մասին, որը իրականութեան հետ որեւէ առնչութիւն չունի։ Այս մասին News.am-ի հետ զրոյցում յայտնել է ՀՅԴ Բիւրոյի անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը։
«Այն թուղթը, որի վերնագրի բովանդակութեան մէջ խաղաղութիւն բառի գործածումը կայ, դա իրական խաղաղութեան հետ որեւէ առնչութիւն չունի։ ԱԳ նախարարի խօսքում ոչ միայն խոցելի, այլ պարզապէս ստեր կային, որոնք որեւէ քննադատութեան չեն դիմանում։ Սա ոչ թէ խաղաղութեան մասին համապարփակ մի փաստաթուղթ կամ համաձայնագիր է, այլ ինչպէս 2 օր առաջ յայտարարեց Ալիեւը լրատւամիջոցների հետ հանդիպմանը, որ այդ համաձայնագիրը արտայայտում է եւ արտացոլում է Հայաստանի եւ Ադրբեջանի միջեւ յարաբերութիւնների կառուցման Ադրբեջանի տեսլականը։ Աւելի խօսուն, քան Ալիեւի գնահատականը այս փաստաթղթին, դժւար է ձեւակերպել, որովհետեւ այն ամբողջութեամբ արտայայտում է ադրբեջանական կողմի պատկերացումները, մտածումները, զիջումները, պարտադրանքը։ Սա փափուկ ուժի գործադրմամբ, առանց պատերազմական գործողութիւնների հերթական կապիտուլիացիոն փաստաթուղթն է»,- ասել է նա։
Գալստեանը համոզմունք է յայտնել, որ սրանով Նիկոլ Փաշինեանի եւ ՔՊ-ական քաղաքական մեծամասնութեան թեթեւ ձեռքով լեգիտիմացւեց ցեղասպանութիւնը, որովհետեւ չի կարող խաղաղութիւն, այն էլ համապարփակ եւ կայուն խաղաղութիւն կառուցւել կամ կոնֆլիկտը հանգուցալուծւած համարել, երբ որեւէ անդրադարձ չկայ այդ յանցագործութիւններին, որոնք միջազգային իրաւունքի նորմերով միջազգային յանցագործութիւններ են եւ ենթակայ են պատժման։
«Խօսում են փոխադարձութեան մասին. դուք պատկերացնո՞ւմ էք որեւէ խաղաղութիւն այն պարագայում, երբ Բաքւի բանտերում այս պահին մենք ունենք հրապարակւած 23 բանտարկեալներ, ներառեալ Արցախի ռազմաքաղաքական ղեկավարութիւնը։
Սուտ է, թէ այդ հարցը միջազգային բոլոր հարթակներում բարձրացնում են։ ՔՊ-ի եւ նրանց առաջնորդի վարքագիծը ստերի յաջորդական մի մեծ ձնագունդ է։ Յիշո՞ւմ էք՝ կուրծք ծեծելով ասում էին՝ ի՞նչ միջանցք, չկայ, մոռացէք, եւ այն, ինչ այսօր կատարւում է Մեղրիի հետ, ըստ էութեան Մեղրիի միջանցք է, Հայաստանի սուվերեն տարածքների յանձնում է բազմաթիւ անորոշութիւններով»,- ասել է նա:
ՀՅԴ Բիւրոյի անդամը հարց է բարձրացրել, թէ ինչո՞ւ պիտի ինքը հաւատայ Արարատ Միրզոյեանի բանաւոր խոստումներին, որ մենք ունենք վաւերացւած որեւէ յստակ փաստաթուղթ, որը հիմք կը տայ մեզ գնահատելու, որ Մեղրիի ստրատեգիական նշանակութիւն ունեցող ճանապարհը ապաշրջափակւում է եւ հարեւանների միջեւ հաստատւում է տրանսպորտային նոր հաղորդակցութիւն, որից մենք պիտի բարգաւաճենք.
«Դուք պարտաւորութիւն ունէիք սեփական ժողովրդին հրապարակելու, թէ ինչ գործողութիւններ են կատարւելու Հայաստանի սուվերեն տարածքի նկատմամբ։ Միջազգային աղբիւրներից ստացւած այն լուրերը, որ մենք ստանում ենք, վկայում են այն մասին, որ 6 կմ խորութեամբ եւ 42 կմ երկարութեամբ մի տարածք է, որը աւելին է Երեւանի վարչական շրջանից կամ Մեղրիի համայնքի մօտաւորապէս 38%–ն է։ Իսկ մենք գիտակցո՞ւմ ենք, թէ դա բնապահպանական, դեմոգրաֆիական, անվտանգային ինչ լրջագոյն մարտահրաւէրներ է ներկայացնում։
Միգուցէ, կայ լսարան, որը կարող է այդ սուտը կուլ տալ, բայց Հայաստանի մտածող քաղաքացիները եւ ընդդիմադիր քաղաքական ուժերը, իրաւունք ունեն չհաւատալու դրան։ Այդ փաստաթղթի վերնագրում օգտագործւած խաղաղութեան բառը ընդամէնը խայծ է։ Դա ոչ միայն խաղաղութիւն չէ, այլ Հայաստանը ներքաշում է աշխարհաքաղաքական նոր բախման մէջ եւ այս նոր բախումը, որը տարածաշրջանում նոր խաղացողների ներկայութիւն է ապահովելու»,- յայտարարել է Լիլիթ Գալստեանը։
