Պակիստանն արգելափակե՞լ է ՇՀԿ-ին միանալու Հայաստանի դիմումը. ՀՀ ԱԳՆ խօսնակի մեկնաբանութիւնը
«ԱԼԻՔ» – «Հայաստանը կը շարունակի աշխատանքները Շանհայի համագործակցութեան կազմակերպութեան շահագրգիռ անդամ երկրների հետ՝ կառոյցի հետ փոխշահաւէտ գործընկերութեան հետագայ զարգացման ուղղութեամբ»: News.am-ի հարցմանն ի պատասխան յայտնել է Հայաստանի ԱԳՆ մամուլի խօսնակ Անի Բադալեանը՝ անդրադառնալով ադրբեջանական ԶԼՄ-ներում տարածւած տեղեկատւութեանը, թէ Պակիստանն արգելափակել է ՇՀԿ-ին միանալու Հայաստանի դիմումը՝ ի պատասխան Հնդկաստանի՝ Ադրբեջանի վերաբերեալ նմանատիպ որոշման.
«Այս պահին գործընթացի մանրամասներին չենք անդրադառնայ, բայց կարող եմ ասել, որ Հայաստանի անդամակցութեան հարցում տեսնում ենք բաւարար կառուցողական մօտեցում, փոխըմբռնում: Այս ընկալմամբ կը շարունակենք աշխատանքները ՇՀԿ շահագրգիռ անդամ երկրների հետ՝ կառոյցի հետ փոխշահաւէտ գործընկերութեան հետագայ զարգացման ուղղութեամբ»,- տեղեկացրել է խօսնակը:
