«Արցախ. չկարգաւորւած հակամարտութիւն, վերադարձի իրաւունք» միջազգային խորհրդաժողով

Սեպտեմբերի 2-ին ՀՅԴ Հայաստանի Գերագոյն մարմնի նախաձեռնութեամբ Երեւանում կայացաւ «Արցախ․ չկարգաւորւած հակամարտութիւն, վերադարձի իրաւունք» խորագրով միջազգային խորհրդաժողովը։

Խորհրդաժողովը համակողմանիօրէն անդրադարձաւ ուժի եւ ուժի սպառնալիքի կիրառման միջոցով հակամարտութիւնները լուծելու անթոյլատրելիութեանը, Արցախի հարցի չլուծւած մնալուն, արցախահայութեան` հայրենիք վերադառնալու իրաւունքի իրացման անհրաժեշտութեանը, ինչպէս նաեւ տարածաշրջանում արդար եւ կայուն խաղաղութեան հաստատման հեռանկարներին։

Խորհրդաժողովին մասնակցեցին եւ ելոյթներով հանդէս եկան Մայր Աթոռ Սուրբ Էջմիածնի Արտաքին յարաբերութիւնների եւ արարողակարգի բաժնի տնօրէն Տէր Նաթան արքեպիսկոպոս Յովհաննիսեանը, ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ պատգամաւոր Իշխան Սաղաթէլեանը, Արցախի Հանրապետութեան Ազգային ժողովի նախագահ Աշոտ Դանիէլեանը, ՀՀ ԱԺ պատգամաւոր, ֆ.մ.գ.թ. Արթուր Խաչատրեանը, Հայաստանի Հանրապետութեան արտաքին գործերի նախկին նախարար Արա Այւազեանը, Կիպրոսի Ազգային ժողովի պատգամաւոր, ԵԽԽՎ անդամ Կոնստանտինոս Էֆստաֆիուն, Հայաստանի պատւոյ շքանշանի ասպետ Ռենէ Ռուքէն Ֆրանսիայից, Հայ Դատի կենտրոնական գրասենեակի տնօրէն Կիրօ Մանոյեանը, Հայ Դատի Կենտրոնական գրասենեակի ծրագրերի պատասխանատու Գէորգ Ղուկասեանը, Եւրոպական խորհրդարանի նախկին պատգամաւոր Լարս Պատրիկ Բերգը Գերմանիայից, Արցախի Հանրապետութեան մարդու իրաւունքների պաշտպան Գեղամ Ստեփանեանը, պատմական գիտութիւնների թեկնածու, Արցախի մշակութային ժառանգութեան հետազօտող Արմինէ Տիգրանեանը, ինչպէս նաեւ Թեհրանի Ալամէ Թաբաթաբայի համալսարանի միջազգային յարաբերութիւնների գիտաշխատող, քաղաքական գիտութիւնների դոկտոր Էհսան Մովահեդիանը։

Յատուկ տեսաուղերձով հանդէս եկաւ նաեւ «Միջազգային քրիստոնէական համերաշխութիւն» կազմակերպութեան նախագահ Ջոն Էյբները՝ ներկայացնելով Խաղաղութեան շւէյցարական նախաձեռնութիւնը։

Խորհրդաժողովը եզրափակւեց ՀՅԴ Բիւրոյի ներկայացուցիչ, ՀՀ ԱԺ պատգամաւոր Արմէն Ռուստամեանի ամփոփիչ ելոյթով։

Միջոցառման ընթացքում ուշադրութեան կենտրոնում էին մի շարք կարեւոր հարցեր․ Ղարաբաղեան հակամարտութեան ներկայ հանգրւանը եւ ընթացող գործընթացների վտանգաւոր միտումները, միջազգային հանրութեան պատասխանատւութիւնն ու արդար եւ կայուն խաղաղութեան հաստատման անհրաժեշտութիւնը, անցեալի փորձի կիրառումը ներկայիս մարտահրաւէրների յաղթահարման գործում, արցախահայութեան շահերի պաշտպանութիւնն ու վերադարձի իրաւունքի իրացումը՝ որպէս կայուն խաղաղութեան նախապայման։ Քննարկւեց նաեւ Ադրբեջանի կողմից իրականացւող մշակութային ժառանգութեան ոչնչացման եւ իւրացման քաղաքականութեան պայմաններում դրա պահպանման հրատապութիւնը, ինչպէս նաեւ գերիների վերադարձի եւ հումանիտար հարցերի շտապ լուծման կարեւորութիւնը, ինչը կարող է հիմք դառնալ փոխվստահութեան մթնոլորտի ձեւաւորման համար։

Խորհրդաժողովը կարեւոր հարթակ դարձաւ տեսակէտների փոխանակման եւ միասնական մօտեցումների մշակման համար՝ ուղղւած Արցախի հարցի արդար լուծմանը, արցախահայութեան հայրենիք վերադառնալու իրաւունքի իրացմանը եւ տարածաշրջանում երկարատեւ ու կայուն խաղաղութեան ապահովմանը։

ՀՅԴ Հայաստանի Գերագոյն մարմնի

Հանրային կապերի գրասենեակ

03.09.25

Երեւան