Հայաստան - ԱրցախՔաղաքական
Յաջորդ կիրակնօրեայ SMS-ները ծիծաղի տեղ չեն թողնելու
ՎԱՀԷ ՅՈՎՀԱՆՆԻՍԵԱՆ
«Այլընտրանքային» նախագծեր խումբ
«Խմած էր, հեծանւից ընկել էր, SMS-ով, Skype-ով հանեց գործից, հեռախօսը վերցրել էին» եւ այլն։ Զաւեշտի աստիճանն այնքան մեծ է, որ իրօք դժւար է զսպել սարկազմը, եւ երէկւանից դաշտը ողողած, երբեմն շատ որակեալ հումորային գրառումները լրիւ հասկանալի են։ Այնուամենայնիւ, փորձենք հասկանալ, թէ ինչ է կատարւել, եկէք նայենք պրոցեսի խորքը։ Կատարւածն ուղիղ կապ ունի առաջիկայ ամիսների պրոցեսների, պետութեան ապագայի ու մեր իւրաքանչիւրի ընտանիքների հետ։ Սա պէտք է լրջացնի բոլորիս։
- Կիրակի երեկոյեան՝ պաշտօնանկութիւնների շարք։ Ինչ է, այս երկիրը աշխատանքային օրեր չունի՞, երկուշաբթին չէ՞ր գալու։ Սա նշանակում է, որ որոշումները կայացնում է ՄԷԿ հոգի՝ շատ նեղ խմբով ու անհասկանալի մոտիւացիաներով։ Սա նշանակում է, որ մի այլ կիրակի երեկոյեան, ասենք կարող ենք իմանալ, որ Հայաստանը դուրս է եկել ՀԱՊԿ-ից՝ դրա բոլոր հետեւանքներով, կամ Էրդողանին խնդրել ենք՝ զօրք մտցնել Հայաստան։ Կա՞յ գոնէ մէկ երաշխիք, որ դա չի լինի։ Այն ժամանակ էլի կատակնե՞ր ենք անելու։
- Պետութեան լիկւիդացիայի փուլերից է պետական բարձրաստիճան պաշտօնների արժեզրկումը։ Նման քայլերով Հայաստանի Հանրապետութեան բարձրագոյն պաշտօններն արժեզրկւում են մինչեւ անիմաստութիւն։ Նման քայլերով են նաեւ մեր պետութիւնից սարքում վրանային աւան։ Պէ՞տք է բացատրել, թէ վերջն ինչ է լինելու։
- Լինէր ուժեղ ընդդիմութիւն՝ չէր լինի ՄԷԿ հոգու կիրակնօրեայ գործունէութիւնը։ Իշխանութիւնն իրեն կաշկանդւած կը զգար։ Ինձ չեն հետաքրքրում պաշտօնանկ արւածները։ Ասում եմ՝ այն պատճառով, որ ուժեղ ընդդիմութիւնը կարեւոր զսպող գործօն է առաջիկայ կիրակնօրեայ ճակատագրական որոշումներ թոյլ չտալու համար։ Ուժեղ ընդդիմութիւնը՝ ԱԺ-ի, փողոցի, ազդեցիկ շրջանակների, հասարակութեան տարբեր շերտերի, ազդեցիկ անհատների, գործիչների՝ գոնէ մի քանի կարեւոր հարցերի շուրջ կոնսոլիդացիան է։ Արւե՞լ է մի բան՝ դրան հասնելու համար։ Ոչ, չի արւել. ամէն մէկը, փակւած իր շքախմբով, սպասում է ինչ-որ բանի։ Ինչի՞ն ենք սպասում, Արցախի ճակատագրի՞ն։ 30 տարւայ պետականութիւնը հանգեց նրան, որ կիրակի երեկոյեան կարելի է առանցքային որոշումներ կայացնել՝ զրոյացնելով պետական ինստիտուտների եւ ընթացակարգերի դերը։ Հակառակորդը սա տեսնում է եւ մշակում է կիրակնօրեայ որոշումների իր սեփական փաթեթները։ «Կիրակնօրեայ պետութիւնները» շատ խոցելի են։
- Շատերի մօտ բնական հարց է ծագում. ո՞ր նորմալ մարդն այսուհետ կը համաձայնի աշխատել այս իշխանութեան հետ, զբաղեցնել ազատւած պաշտօնները։ Սա կիսատ հարցադրում է, որովհետեւ այո, հէնց որպէս «կիրակնօրեայ փոխարինողներ»-ի համար վաղօրօք պատրաստւած են մարդիկ, ինչ-որ «կարեւոր բաների» ունակ, ինչ-որ բաների երդում տւած (առաջիկայում այս հարցին աւելի մանրամասն կանդրադառնամ)։
- Շատ կարեւոր է ֆիքսել, որ կիրակնօրեայ պաշտօնանկութիւնները չեն ազատում շատերին՝ իրենց գործունէութեան ընթացքում արած անօրինականութիւնների համար, մարդկանց ճակատագրերի եւ պետութեան հետ խաղալու համար, անկախ այն բանից, թէ ում հրամանով են դրանք արւել։
