«Բազմաթիւ են դէպքերը, երբ անձինք Հայոց Ցեղասպանութիւնը հերքում են». ընդդիմութիւնը հերքելը քրէականացնող նախագիծ է մշակել

«ԱԼԻՔ» – ԱԺ «Հայաստան» խմբակցութիւնը շրջանառութան մէջ է դրել օրէնքի նախագիծ, որով առաջարկւում է քրէականացնել Հայոց Ցեղասպանութեան հերքելը, մեղմացնելը կամ արդարացնելը,- տեղեկացնում է  «Երկիր»-ը:

ԱԺ պետաիրաւական հարցերի յանձնաժողովում նախագծի վերաբերեալ քննարկում է տեղի ունեցել, նախագիծը ներկայացրել է «Հայաստան» խմբակցութեան քարտուղար Արծւիկ Մինասեանը։

Արծւիկ Մինասեանը անդրադառնալով նախագծի հիմնաւորմանը, նշել է. «Թէեւ գործող ՀՀ քրէական օրէնսգրքի 136-րդ յօդւածը սահմանում է ցեղասպանութեան հերքման պատասխանատւութեան դրոյթ, սակայն այն չունի յատուկ մօտեցում Հայոց Ցեղասպանութեանը, ինչը կարծում ենք այս դէպքում արդարացւած չէ, քանի որ նախ բազմաթիւ երկրներ ու միջազգային կազմակերպութիւններ արդէն իսկ ճանաչել եւ դատապարտել են հայ ժողովրդի հանդէպ իրականացւած այս ոճրագործութիւնը: Բացի այդ, ուսումնասիրելով միջազգային փորձը, հարկ է արձանագրել, որ ցեղասպանութիւնը հերքելը, մերժելը կամ ուրանալը քրէօրէն պատժելի արարք է համարւում աշխարհի շատ երկրներում»:

Ըստ նախագծի՝ Հայոց Ցեղասպանութիւնը հերքելու պարագայում առաջարկւում է սահմանել պատիժ տուգանքով՝ նւազագոյն աշխատավարձի հարիւրապատիկից երեքհարիրապատիկի չափով, կամ հանրային աշխատանքներով՝ հարիւր յիսունից երկու հարիւր յիսուն ժամ տեւողութեամբ, կամ ազատութեան սահմանափակմամբ՝ առաւելագոյնը երեք տարի ժամկէտով, կամ կարճաժամկէտ ազատազրկմամբ՝ մէկից երկու ամիս ժամկէտով, կամ ազատազրկմամբ՝ առաւելագոյնը չորս տարի ժամկէտով:

Նշենք, որ ընդդիմութեան ներկայացրած նախագծին ՀՀ կառավարութիւնը բացասական եզրակացութիւն է տւել։

«Պարզ է, որ կառավարութիւնը տւել է բացասական եզրակացութիւն, իսկ ինչպէս պարզւեց՝ կառավարութիւնը Նիկոլ Փաշինեանն է, դուք հիմա պիտի մերժէք»,-դիմելով յանձնաժողովի իշխանական պատգամաւորներին ասաց Արծւիկ Մինասեանը։