Ի՞նչ պատասխանատւութիւն են կրելու…

ՀՅԴ Բիւրոյի անդամ, ՀՀ ԱԺ «Հայաստան» խմբակցութեան պատգամաւոր, Լիլիթ Գալստեանը դիմել է ՀՀ ԿԳՄՍ նախարարին՝ տեղեկատւութիւն ստանալու Հայոց Ցեղասպանութեան զոհերի յուշահամալիրում եւ Յովհաննէս Թումանեանի թանգարանում իրականացւող աշխատանքների վերաբերեալ.

«Պաշտօնական նամակով դիմել եմ ՀՀ ԿԳՄՍ նախարարին՝ ամբողջական տեղեկատւութիւն ստանալու ՀԱՅՈՑ ՑԵՂԱՍՊԱՆՈՒԹԵԱՆ ԶՈՀԵՐԻ ՅՈՒՇԱՀԱՄԱԼԻՐ-ում եւ ՅՈՎՀԱՆՆԷՍ ԹՈՒՄԱՆԵԱՆԻ ԹԱՆԳԱՐԱՆ-ում պետական ֆինանսաւորմամբ իրականացւող վերանորոգման աշխատանքների կազմակերպման եւ ընթացքի վերաբերեալ։

Երկու հաստատութիւնում էլ այս պահին աշխատանքները դադարեցւած են վերանորոգման ընթացքում բացայայտւած խայտառակ եւ անթոյլատրելի պատկերի պատճառով…

Հանրապետական նշանակութեան յուշարձան լինելու կողքին, այս երկու կառոյցներն էլ ողջ հայութեան համար նւիրական ու նշանային հասցեներ են…։

Մասնաւորապէս ակնկալում եմ ամբողջական տեղեկատւութիւն ստանալ հետեւեալ հարցերի առնչութեամբ։

1․ Ո՞ւմ կողմից եւ ինչպէ՞ս է կազմակերպւել Յուշարձանների վերանորոգման եւ վերականգնման աշխատանքների իրականացման մրցոյթը։ Քանի՞ կազմակերպութիւն է մասնակցել մրցոյթին։

2․ Ինչպէ՞ս եւ ի՞նչ չափանիշներով է ընտրւել այն կազմակերպութիւնը, որը պէտք է վերանորոգման աշխատանքներ կատարէր։

3․ Տւեալ մրցոյթում յաղթած կազմակերպութիւնը պատմամշակութային, այն էլ՝ հանրապետական նշանակութեան յուշարձան նորոգելու փորձ եւ համապատասպան կարողութիւններ ունի՞։

4․ Ինչպէ՞ս են կազմակերպւել վերանորոգման նախագծային աշխատանքները, արդեօք գնահատւել են ռիսկերը, իրականացւե՞լ է յուշարձանի պատշաճ ուսումնասիրութիւն՝ կապւած ընդգրկող մակերեսների, վերականգնման մեթոդների եւ նիւթերի ընտրութեան առնչութեամբ։

5․ Իրականացւե՞լ է արդեօք շինարարութեան կազմակերպման նախագիծ՝ ներառելով բոլոր ուղղութիւնները։

6․ Ինչո՞ւ ԿԳՄՍ նախարարութիւնը՝ որպէս պատւիրատու եւ Քաղաքաշինութեան կոմիտէն՝ որպէս տեսչական լիազօրութիւն ունեցող պետական լիազօր մարմին կամ՝ «Հայնախագիծը», չեն իրականացրել օրէնքով իրենց վերապահւած գործառոյթներ՝ գերատեսչական, հեղինակային եւ տեսչական հսկողութեան իրականացնելու հաստատւած նախագծի նկատմամբ եւ կանխելու յուշարձանի վնասումն ու խոշտանգումը։

7․ Իսկ, եթէ մայիսի 1-ից սկսւած վերականգնման աշխատանքների նկատմամբ տեսչական, վերահսկողական կամ հեղինակայնի աշխատանքներ կատարւել են, ապա տրամադրէք վեր հանւած խնդիրների առնչութեամբ արձանագրութիւնները։

8․ Այս պահին առերեւոյթ դադարեցւած նախագծի առնչութեամբ ի՞նչ մօտեցում է որդեգրել նախարարութիւնը եւ ի՞նչ հանգուցալուծում է տեսնում։

9․ Ի՞նչ պատասխանատւութիւն են կրելու իրենց լիազօրութիւններն ու պարտականութիւնները ձախողած պաշտօնատար անձինք»։