Axios. «Թրամփը նախապէս իմացել է Կատարի վրայ պատրաստւող հարւածների մասին, սակայն չի առարկել»
«ԱԼԻՔ» – Իսրայէլի վարչապետ Բենիամին Նեթանիահուն երեքշաբթի առաւօտեան նախագահ Թրամփին յայտնել է, որ Իսրայէլը պլանաւորում է յարձակւել ՀԱՄԱՍ-ի առաջնորդների վրայ Կատարում հարւածներից կարճ ժամանակ առաջ, Axios պարբերականին յայտնել են երեք իսրայէլցի պաշտօնեաներ։
Սպիտակ տունը յայտարարել էր, որ տեղեկացւել է միայն հրթիռների արձակումից յետոյ, ինչը Թրամփին հնարաւորութիւն չի տւել առարկելու։ Եօթ իսրայէլցի պաշտօնեաներ յայտնել են, որ Սպիտակ տունը հասցւելիք հարւածի մասին նախապէս գիտէր։ Հաղորդում է News.am-ը:
Երեք իսրայէլցի պաշտօնեաներ յայտնել են, որ Նեթանիահուն առաւօտեան 8-ի սահմաններում զանգահարել է Թրամփին՝ հարւածի մասին տեղեկացնելու համար։ Դոհայում պայթիւնների մասին առաջին հաղորդագրութիւնները ստացւել են առաւօտեան ժամը 8:51-ին։
«Թրամփը հարւածի մասին գիտէր նախքան հրթիռների արձակումը։ Նեթանիահուի եւ Թրամփի միջեւ քաղաքական քննարկում է եղել, ապա՝ ռազմական խողովակներով։ «Թրամփը «ոչ» չի ասել»,- յայտարարել է իսրայէլցի բարձրաստիճան պաշտօնեան։
Մէկ այլ բարձրաստիճան իսրայէլցի պաշտօնեայ յայտարարել է, որ ԱՄՆ-ը քաղաքական մակարդակով «շատ աւելի վաղ» տեղեկացւած է եղել։ «Եթէ Թրամփը ցանկանար դադարեցնել դա, կարող էր դա անել։ Գործնականում նա նման քալ չարեց»,- նշել է իսրայէլցի պաշտօնեան։
Երկու պաշտօնեաներն էլ յայտարարել են, որ հրթիռները դեռ չէին արձակւել, երբ Թրամփը եւ Նեթանիահուն խօսել են, եւ յայտարարել, որ եթէ Թրամփը դէմ լինէր, Իսրայէլը կը չեղարկէր հարւածը։
