Վարդան Օսկանեան. ««Չորրորդ Հանրապետութեան» մասին խօսելը միայն ցինիկ փորձ է՝ ձախողումը ներկայացնելու որպէս վերածնունդ»
«ԱԼԻՔ» – ««Չորրորդ Հանրապետութեան» մասին խօսելը միայն ցինիկ փորձ է՝ ձախողումը ներկայացնելու որպէս վերածնունդ»: Այս մասին ֆէյսբուքեան իր էջում գրել է ՀՀ նախկին ԱԳ նախարար Վարդան Օսկանեանը՝ անդրադառնալով նախօրէին իշխող «Քաղաքացիական պայմանագիր» կուսակցութեան համագումարում, Հայաստանի «Չորրորդ Հանրապետութիւն» ստեղծելու մտադրութեան մասին Նիկոլ Փաշինեանի յայտարարութեանը:
«Այսօր, սեպտեմբերի 21-ին, Հայաստանում ու աշխարհի տարբեր անկիւններում ապրող հայերը նշում են մեր անկախութեան 34-րդ տարեդարձը։ Այս օրը պատկանում է նրանց, ովքեր դարեր շարունակ կրեցին ինքնիշխանութեան երազանքը, նրանց, ովքեր պաշտպանեցին այն ռազմի դաշտում, եւ նրանց, ովքեր իրենց ամենօրեայ աշխատանքով ու զոհաբերութեամբ ամրապնդում են այն։ Սա օր է՝ արժեւորելու տոկունութիւնն ու շարունակականութիւնը, նշելու ազատ Հայաստանը՝ ինչքան էլ այն վիրաւորւած լինի, եւ վերանորոգելու մեր յանձնառութիւնը, որ անկախութիւնը մնայուն մնայ։
Սակայն այս տարեդարձի նախօրէին Նիկոլ Փաշինեանը որոշեց ազգային քննարկման մէջ ներմուծել պատեհապաշտութեան նոր մի տարր։ Երէկ տեղի ունեցած կուսակցական համագումարում, որտեղ նա կրկին ընտրւեց կուսակցութեան ղեկավար, Փաշինեանը յայտարարեց իր ձգտումը ստեղծելու Հայաստանի «Չորրորդ Հանրապետութիւն»։ Նման քայլեր արւում են կործանարար ձախողումներից ու ցնցումներից յետոյ, երբ ազգերը փորձում են վերաձեւել իրենց քաղաքական կարգը։ Բայց այն մարդը, որը եօթ տարի արդէն ղեկավարում է երկիրը եւ որի պաշտօնավարման ընթացքում երկիրը ապրել է միայն աղէտներ ու ցնցումներ, չի կարող լինել նոր հանրապետութիւն հռչակողը. դա վիրաւորանք է թէ՛ պատմութեանը, թէ՛ հայ ժողովրդին։
Փաշինեանը վերջին մարդն է այս աշխարհում, ով կարող է առաջնորդել նման վերափոխումը։ «Չորրորդ Հանրապետութեան» մասին խօսելը միայն ցինիկ փորձ է՝ ձախողումը ներկայացնելու որպէս վերածնունդ։ Եթէ Հայաստանը երբեւէ կարիք ունենայ նման փոփոխութեան, ապա դա լինելու է միայն նրա համար, որ այս եօթ տարւայ ժառանգութիւնը ջնջւի երկրի ուղեգծից։ Հայաստանին անհրաժեշտ է իսկական նորացման գործընթաց, որը կը վերականգնի ժողովրդավարական կառավարման հանդէպ վստահութիւնը, կապահովի պետութեան ինքնիշխանութիւնը, կը վերադարձնի իր օրինական իրաւունքները եւ կը բուժի վիրաւորւած ժողովրդի վէրքերը։
Հետեւաբար, այս անկախութեան օրը չպէտք է թոյլ տանք, որ Փաշինեանի «նոր հանրապետութեան» դատարկ յայտարարութիւնները շեղեն մեզ մեր օրակարգից։ Եկէք ինքներս մեզ շնորհաւորենք այս 34 տարիների գոյատեւման համար եւ վերահաստատենք մեր հաւատամքը՝ թոյլ չտալու, որ մեր անկախութիւնը վատնւի որեւէ ուժի կողմից»,- գրել է Օսկանեանը:
