Իշխան Սաղաթէլեան. «Ակնկալում ենք, ողջամիտ ժամանակահատւածում լրացնել պակասող ստորագրութիւնները»
«ԱԼԻՔ» – ՀՀ ԱԺ «Պատիւ ունեմ» խմբակցութեան նախաձեռնութեամբ, սեպտեմբերի 26-ին հրաւիրւել էին խորհրդարանական լսումներ: Քննարկւում էր խմբակցութեան ներկայացրած «Ազգային ճգնաժամի եւ կառավարման ձախողման մասին» ԱԺ յայտարարութեան նախագիծը: Հաղորդում է Aravot.am-ը:
ՀՅԴ Հայաստանի ԳՄ ներկայացուցիչ, ԱԺ «Հայաստան» խմբակցութեան պատգամաւոր Իշխան Սաղաթէլեանը ներկայացրել է խմբակցութեան եւ դաշինքի դիրքորոշումն այս նախագծի վերաբերեալ։
Նա ասել է, որ իրենք ամբողջութեամբ կիսում են յայտարարութեան մէջ ներկայացւած փաստերն ու հիմնաւորումները։ «Աւելին, վերհաստատում ենք մեր դիրքորոշումները, որ Նիկոլ Փաշինեանի կառավարութեան ժամանակահատւածում բազմաթիւ անգամ խախտւել է մեր երկրի սահմանադրական կարգը, Նիկոլ Փաշինեանը գործել է պետական դաւաճանութեան յատկանիշներով։ Եւ Նիկոլ Փաշինեանին պաշտօնազրկելու իրաւա-քաղաքական հիմքերը անհերքելի են։ Հետեւաբար, մեր դիրքորոշումը հետեւեալն է՝ նախագծին կողմ ենք, ե՛ւ յանձնաժողովում, ե՛ւ լիագումար նիստում կողմ ենք քւէարկելու»,- ասել է Սաղաթէլեանը։
Նա նշել է, որ որեւէ մէկը կասկածի տակ չի դնում այն հարցը, որ այս իշխանութիւնը մեր պետականութեանը սպառնալիք է, եւ նրանց՝ մէկ օր աւելի իշխանութեանը մնալը վտանգաւոր է։ «Ամբողջ հարցը հետեւեալն է՝ ինչպէ՞ս, ի՞նչ ժամկէտներում եւ ի՞նչ ճանապարհով ազատւել այս իշխանութիւնից։ Նախորդ 5 տարիների ընթացքում մենք փորձել ենք մթնոլորտ գեներացնել, մեր երկրում համաժողովրդական շարժում ձեւաւորել, եւ, այո, մենք տեսել ենք ճանապարհը՝ սահմանադրական ճանապարհով երկրի խորհրդարանում իմպիչմենտի ճանապարհով հասնել իշխանափոխութեան։ Բայց ինչո՞ւ մինչեւ հիմա մենք չենք եկել խորհրդարան, եւ այս հարցը չի մտել օրակարգ՝ բացառապէս մի պատճառով, որ մենք չենք ունեցել բաւարար ստորագրութիւններ՝ խորհրդարան մտնելու եւ յաջողութեան հասնելու համար։
Մեր գործընկեր «Պատիւ ունեմ» խմբակցութիւնը՝ ի դէմս ՀՀԿ-ի, ստանձնել է քաղաքական պատասխանատւութիւնը եւ յայտարարել իմպիչմենտի գործընթաց սկսելու մասին։
Մեր դիրքորոշումը եղել է հետեւեալը, որ մենք միանում ենք իմպիչմենտի գործընթացին, հրապարակել ենք մեր ստորագրութիւնները, ասել ենք՝ եկէք արձանագրենք, որ «Հայաստան» խմբակցութիւնը միացած է եւ ուժերը կենտրոնացնենք իշխանական պատգամաւորների վրայ՝ փորձելով ունենալ պակասող ստորագրութիւնները եւ սկսել գործընթաց։ Անցել է 3-4 ամիս, մեր գործընկերները պարբերաբար յայտարարել են, որ պրոցեսը չի ընդլայնւում եւ առաջ չի գնում նաեւ այն պատճառով, որ «Հայաստան» խմբակցութեան պատգամաւորները չեն ստորագրել այն ձեւաթղթի տակ, որը ներկայացրել է «Պատիւ ունեմ» խմբակցութիւնը։ Նաեւ եղել է հրապարակային յայտարարութիւն, որ իշխանական պատգամաւորները չեն միանում այն պատճառով, որովհետեւ այդ ձեւաթղթի տակ չկայ մեր ստորագրութիւնը։
Հետեւաբար, հաշւի առնելով նոր իրողութիւնը եւ մեր գործընկերների այդ վստահեցումը, ես մեր խմբակցութեան պատգամաւորների՝ երեք ամիս առաջ ստորագրած ստորագրութիւնները հիմա կը փոխանցեմ «Պատիւ ունեմ» խմբակցութեանը՝ կցելու այդ գործընթացին եւ ֆիքսելու, որ մեր ստորագրութիւնները կային ինչպէս 3 ամիս առաջ, այնպէս էլ հիմա»,- յայտարարել է Իշխան Սաղաթէլեանը։
Նա ընդգծել է` ակնկալում է, որ ողջամիտ ժամանակահատւածում հնարաւոր կը լինի լրացնել պակասող ստորագրութիւնները եւ իմպիչմենտի իրական մեկնարկը տալ ԱԺ դահլիճում։
