Middle East Eye. «Աւելի քան 9100 պաղեստինցի բանտարկեալներ դեռեւս Իսրայէլի կալանքի տակ են»
«ԱԼԻՔ» – Չնայած երկուշաբթի Իսրայէլի հետ կալանաւորների փոխանակման համաձայնագրի շրջանակում գրեթէ 2000 պաղեստինցի բանտարկեալների ազատ արձակմանը, աւելի քան 9100 պաղեստինցիներ ծանր եւ վատթարացող պայմաններում մնում են Իսրայէլի կալանքի տակ, հաղորդում է Middle East Eye-ը։
Երկուշաբթի օրւայ փոխանակման արդիւնքում ազատ արձակւեցին Գազայում պահւող 20 իսրայէլցի բանտարկեալներ, ինչը 2023 թւականի հոկտեմբերին պատերազմի սկսւելուց ի վեր Իսրայէլի եւ ՀԱՄԱՍ-ի միջեւ երրորդ կալանաւորների փոխանակումն էր։
Պատերազմի սկսւելուց մէկ ամիս անց, եօթօրեայ կարճատեւ զինադադարի ընթացքում 240 պաղեստինցի բանտարկեալներ ազատ արձակւեցին 105 բանտարկեալների դիմաց։ Երկրորդ փոխանակման ժամանակ, որը տեղի ունեցաւ յունւար եւ փետրւար ամիսներին, ազատ արձակւեցին 1778 պաղեստինցիներ՝ 38 պատանդների դիմաց։ Ընդհանուր առմամբ ազատ են արձակւել 3985 պաղեստինցիներ՝ 163 իսրայէլցիների դիմաց։
Սակայն, չնայած բոլոր ողջ իսրայէլցի գերիների վերադարձին, աւելի քան 9100 պաղեստինցիներ դեռեւս Իսրայէլի բանտերում են, որոնցից շատերը պահւում են առանց մեղադրանքի կամ դատավարութեան։ Նրանք պահւում են հաստատութիւններում, որոնք իրաւապաշտպան կազմակերպութիւնները որակում են «խոշտանգումների ճամբարներ»: Այնտեղ նրանք ենթարկւում են ամենօրեայ բռնութեան, ծեծի, սովի եւ նւաստացման: Պատերազմից առաջ իսրայէլական բանտերում պահւում էր մօտ 5000 պաղեստինցի բանտարկեալ։
Այդ ժամանակւանից ի վեր այս թիւը կրկնապատկւել է՝ 2025 թւականի հոկտեմբերին հասնելով աւելի քան 11 հազար 100-ի: Վերջին գերիների փոխանակումից յետոյ կալանաւորւածների ընդհանուր թիւը նւազել է մինչեւ մօտ 9100-ի:
Ներկայում բանտարկւածների թւում են 52 կին եւ 18 տարեկանից փոքր 400 երեխայ: Բացի դրանից, տասնեակ բժշկական աշխատողներ, լրագրողներ, ակտիւիստներ եւ քաղաքացիական անձինք պահւում են առանց մեղադրանքի կամ անորոշ մեղադրանքներով, ինչպիսիք են «սադրանքը»:
