Չինաստանի պաշտպանութեան նախարարութիւնը զգուշացրել է ԱՄՆ-ին «Թայւանի խաղաքարտը խաղարկելու փորձերի» վերաբերեալ
«ԱԼԻՔ» – Չինաստանի պաշտպանութեան նախարարութեան ներկայացուցիչը ուրբաթ օրը կոչ է արել Միացեալ Նահանգներին զերծ մնալ «Թայւանեան քարտը» խաղարկելու ռիսկային փորձերից եւ Չինաստանի Թայւանի տարածաշրջանը զինելուց, զգուշացնելով, որ «նման ցանկացած քայլ թանկ կարժենայ Միացեալ Նահանգներին», հաղորդում է News.am-ը։
Չինաստանի ազգային պաշտպանութեան նախարարութեան խօսնակ Չժան Սեաոգանգը յայտարարութիւնն արել է ԱՄՆ Կոնգրեսի կողմից ընդունւած «Ազգային պաշտպանութեան լիազօրման մասին» նոր օրէնքի վերաբերեալ լրատւամիջոցների հարցմանը ի պատասխան, որը դրոյթներ է ներառում Թայւանի հետ այսպէս կոչւած ռազմական համագործակցութիւնը ամրապնդելու համար՝ ընդհանուր առմամբ 1 միլիարդ ԱՄՆ դոլարի միջոցներ յատկացնելու վերաբերեալ։
Չժանգի խօսքով՝ «Չինաստանի ներքին գործերին երկրի ակնյայտ միջամտութեանը վերաբերող օրէնքի բացասական դրոյթները խաթարում են Չինաստանի ինքնիշխանութիւնը, անվտանգութիւնն ու զարգացման շահերը, ինչպէս նաեւ խախտում են համաշխարհային խաղաղութիւնն ու կայունութիւնը»։
Այս դրոյթների դէմ խիստ բողոք յայտնելով՝ Չժանը ընդգծել է, որ Թայւանի հարցը առաջին կարմիր գիծն է, որը չի կարելի հատել չին-ամերիկեան յարաբերութիւններում։
Նա կոչ է արել Միացեալ Նահանգներին լիովին հետեւել «մէկ Չինաստան» սկզբունքին եւ չին-ամերիկեան երեք համատեղ հաղորդագրութիւններին, ինչպէս նաեւ անսասան կերպով կատարել իր խոստումը՝ չաջակցել «Թայւանի անկախութեանը» եւ զերծ մնալ Թայւանի անկախութեան կողմնակից անջատողականներին սխալ ազդանշաններ ուղարկելուց կամ Թայւանի չինական տարածաշրջանի հետ որեւէ ռազմական փոխազդեցութեան մէջ մտնելուց։
