Վարդան Ոսկանեան. «Ոչ միայն չի նւազել, այլ նաեւ աւելացել է Մայր Աթոռին հանրային աջակցութիւնը»
«ԱԼԻՔ» – «Ոչ միայն չի նւազել, այլ նաեւ աւելացել է Մայր Աթոռին հանրային աջակցութիւնը, քանզի այն հանդիսանում է ոչ թէ որպէս բացառապէս կրօնական, այլ նաեւ ազգային հաստատութիւն»: Այս մասին սոցցանցերի իր հարթակներում գրել է իրանագէտ Վարդան Ոսկանեանը:
Նա մասնաւորապէս նշել է.
«Հայաստանեայց Առաքելական Սուրբ Եկեղեցու թիրախաւորումը դա ծրագրւած կերպով իրականացնողների համար, փառք Աստծոյ, առայժմ հիմնականում անպտուղ գործընթաց է, որի միակ «արդիւնքն» ընդամենը նախկին մի քահանայի անցումն է թիրախաւորողների կողմը եւ մէկ եկեղեցում անցկացւած «պատարագ» կոչեցեալ «միջոցառումը»։
Առաքելական մեր Սուրբ Եկեղեցու եպիսկոպոսական եւ քահանայական դասերի, ինչպէս նաեւ նւիրապետական չորս աթոռների միջեւ որեւէ պառակտում տեղի չի ունեցել։ Ոչ միայն չի նւազել, այլ նաեւ, կարծում եմ՝ աւելացել է Մայր Աթոռին հանրային աջակցութիւնը, քանզի այն հանդիսանում եւ դիրքաւորւում է ոչ թէ որպէս բացառապէս կրօնական, այլ նաեւ ազգային հաստատութիւն՝ ընդ որում, համահայկական մակարդակում փաստացիօրէն միակը, որը պահպանում է Արցախի ազգային-հոգեւոր բացառիկ կառուցակարգը՝ վտարանդութեան մէջ գտնւող թեմը։
Արդեօ՞ք սա նշանակո՞ւմ է, թէ պէտք է հանգստանալ եւ դադարել աշխատել առկայ մարտահրաւէրները կառավարելու եւ չէզոքացնելու ուղղութեամբ։ Բնականաբար ոչ, քանզի հէնց Սուրբ Էջմիածնում ամփոփւած Ներսէս Ե Աշտարակցի կաթողիկոսի շիրմաքարին փորագրւած «Պաշտպան Հայրենեաց» բնորոշումն այսօր վերաբերում է ողջ Մայր Աթոռին, իսկ միլիոնաւոր հայորդիների հայեացքը գամւած է հէնց Սուրբ Էջմիածնի խաչալոյս գմբէթներին»:
