«ԱԼԻՔ» – Իրանի Իսլ. Հանրապետութեան արտաքին գործերի նախարար Սէյէդ Աբբաս Արաղչին արձագանքել է խաղաղութեան Նոբէլեան մրցանակի այս տարւայ դափնեկրի կողմից սիոնիստական ռեժիմի յանցագործների գովասանքին՝ ընդգծելով, որ Նոբէլեան մրցանակը վաղուց կորցրել է իր երբեմնի վարկը։
Արաղչին «X» սոցիալական ցանցի իր պաշտօնական էջում գրել է․
«Աշխարհի բազմաթիւ ժողովուրդների համար Նոբէլեան մրցանակը վաղուց կորցրել է այն յարգանքն ու վարկը, որը պէտք է ունենար։ Պատճառն այն է, որ այս մրցանակը տարիներ շարունակ օգտագործւել է որպէս գործիք՝ յարձակում գործելու արեւմտեան արեւելում չունեցող այն կառավարութիւնների դէմ, որոնք համարւել են Արեւմուտքի շահերի «թշնամի»»:
Նախարարը նշել է, որ այս տարւայ՝ իբր «խաղաղութեան» մրցանակը շնորհւել է այն անձին, ով իրականում խրախուսում է պատերազմը սեփական երկրի դէմ եւ միաժամանակ գովաբանում է Պաղեստինում ցեղասպանութիւն ու պատերազմական յանցագործութիւններ իրականացնողներին։
ԱԳ նախարարի խօսքով՝ այս ամէնը աւելի քան երբեւէ ապացուցում է, որ Նոբէլեան մրցանակը վերածւել է քաղաքական գործիքի։
Յիշեցնենք, որ այս տարւայ խաղաղութեան Նոբէլակիր Մարիա Կորինա Մաչադօն աւելի վաղ իր սոցիալական ցանցում յայտնել էր Իսրայէլի վարչապետի հետ ունեցած հեռախօսազրոյցի մասին՝ ՀԱՄԱՍ-ը, «ՀԵԶԲՕԼԼԱՀ»-ը եւ Հութիներին ահաբեկչական խմբեր որակելով բացայայտ աջակցել էր Գազայում սիոնիստական ռեժիմի յանցաւոր գործողութիւններին։ Նա նաեւ հանդէս էր եկել Դոնալդ Թրամփի՝ իր երկրի դէմ ռազմական միջամտութիւն նախատեսող ծրագրերի իրականացման օգտին։
