Տիգրան Աբրահամեան. «Իշխանութիւնը քաղաքական հետապնդումներ է սկսել ոչ միայն յաղթող համայնքապետերի, այլ ընտրութիւններին լաւ արդիւնքներ ցոյց տւած ուժերի նկատմամբ»
«ԱԼԻՔ» – «Քաղաքական իշխանութեան եւ նրա ամբարտաւան ներկայացուցիչների ինքնավստահութեան հիմքում իրաւապահ համակարգի ներկայիս կարգավիճակն է, երբ վերջիններս պարզապէս ընդդիմախօսների դէմ մահակի են վերածւել»: Այս մասին ֆէյսբուքեան իր էջում գրել է ՀՀ ԱԺ «Պատիւ ունեմ» խմբակցութեան քարտուղար Տիգրան Աբրահամեանը։
«Իշխանութիւնը «քայլ առաջ» է արել` ճնշումներ եւ քաղաքական հետապնդումներ է սկսել ոչ միայն յաղթող համայնքապետերի, այլ ընտրութիւններին լաւ արդիւնքներ ցոյց տւած ուժերի նկատմամբ:
Սրանց նպատակը` 2026-ին ընդառաջ, մրցունակ բոլոր ուժերին, գործիչներին էականօրէն թուլացնելն է կամ մեկուսացնելը:
Դաշտի հնարաւոր բոլոր մրցակիցները հռչակւել են թշնամիներ եւ նրանց նկատմամբ տարբեր բնոյթի յարձակումներ են իրականացւում:
Ակնյայտ է, որ իշխանութեան ագրեսիւ գործողութիւնները ակտիւութեան դինամիկա ունեն եւ առաջիկայում առաւել սուր բնոյթ են կրելու:
Իշխանութեան դէմ քաղաքական պայքարի ցանկացած նախաձեռնութիւն, ծրագիր պէտք է հաշւի այս իրողութիւնները, հակառակ դէպքում տապալումը երաշխաւորւած է»,- գրել է նա:
