Թուրքիան շահագրգռւած է, որ Հայաստանը լռելեայն կատարի Ադրբեջանի բոլոր պահանջները

Պարզապէս Թուրքիան կրկնում է այն, ինչը Հայաստանի իշխանութիւնն արդէն մի քանի տարի Թուրքիայի հետ այս «սիրավէպի» օրերին փորձում է հերքել. Aysor.am-ի հետ զրոյցում ասաց ՀՅԴ Հայաստանի ԳՄ անդամ, «Հայաստան» խմբակցութեան պատգամաւոր Գեղամ Մանուկեանը՝ անդրադառնալով Թուրքիայի ԱԳ նախարար Հաքան Ֆիդանի յայտարարութեանը եւ ՀՀ ԱԳ նախարար Արարատ Միրզոյեանի արձագանքին։

Յիշեցնենք, որ Ֆիդանը յայտարարել էր, թէ Հայաստանի համար կարեւոր է Թուրքիայի հետ յարաբերութիւնների կարգաւորումը, եւ եթէ Թուրքիան այն անի հիմա, ապա Հայաստանից «կը խլի» Ադրբեջանի հետ խաղաղութեան համաձայնագիրը ստորագրելու ամենամեծ դրդապատճառը։ Դրան ի պատասխան՝ Արարատ Միրզոյեանը նշել էր, որ Թուրքիայի հետ յարաբերութիւնների կարգաւորումը կարող է դրականօրէն անդրադառնալ Ադրբեջանի հետ կարգաւորման գործընթացի վրայ։

«Թուրքիան ՀՀ-ի հետ խօսում է նախապայմաններով, հիմա էլ շարունակում է խօսել նախապայմաններով եւ շարունակելու է խօսել նախապայմաններով, ինչը, ջայլամային քաղաքականութեամբ ՀՀ իշխանութիւնները փորձում են չնկատելու տալ»,- ասաց Մանուկեանը։

Հարցին, թէ արդեօ՞ք ՀՀ-ն դեռեւս Թուրքիային տալու որեւէ բան ունի՝ Մանուկեանը պատասխանեց. «ՀՀ-ն չունի որեւէ բան տալու. պարզապէս այս իշխանութիւններն են պատրաստ ամէն ինչ տալ, իսկ Թուրքիան ուզում է ամէն ինչ ստանալ՝ յանձինս Ադրբեջանի հետ Հայաստանի բանակցութիւնների։ Քանի դեռ ադրբեջանական բոլոր պահանջները չեն կատարւել, Թուրքիան շարունակելու է նոյն շրջափակման քաղաքականութիւնը»։

Թուրքիան շահագրգռւա՞ծ է հայ-ադրբեջանական գործընթացն աւարտին հասցնելու հարցում՝ ընդդիմադիր պատգամաւորը նշեց. «Թուրքիան շահագրգռւած է, որ Հայաստանը լռելեայն կատարի Ադրբեջանի բոլոր պահանջները»։

Arfd.am