Վեհափառ Հայրապետ. «Խիստ մտահոգիչ է իշխանութիւնների որդեգրած հակաեկեղեցական քաղաքականութիւնը»
«ԱԼԻՔ» – «Խիստ մտահոգիչ է իշխանութիւնների որդեգրած հակաեկեղեցական քաղաքականութիւնը»: Այս մասին ըստ News.am-ի՝ Մարսէլի «Սրբոց Թարգմանչաց» եկեղեցում յայտարարել է Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը:
Նա, մասնաւորապէս, նշել է. «Այսօր նոյնպէս մեր հայրենիքը եւ Հայոց եկեղեցին անցնում են դժւարութիւնների ու մեծ մարտահրաւէրների միջով։ Անցնող հինգ տարիների ընթացքում Արցախեան պատերազմի, Արցախի հայաթափման եւ մեր հոգեւոր մշակութային արժէքների ոչնչացման ուղղւած Ադրբեջանի քաղաքականութեան հետեւանքով դեռեւս արնահոսում են ազգի զաւակների սրտերը, շարունակում են բաց մնալ արցախահայութեան իրաւունքների պաշտպանութեան, Ադրբեջանում գերութեան մէջ պահւող հայորդիների ազատ արձակման եւ չընդհատւող մշակութային ցեղասպանութիւնը կասեցնելու հարցերը, որոնք կարօտ են ամենքիս միասնական ջանքերի եւ հետեւողականութեան։
Հայրենիքում տիրող դժւարին իր վիճակում խիստ մտահոգիչ է նաեւ իշխանութիւնների որդեգրած հակաեկեղեցական քաղաքականութիւնը, որոնք ապօրինի քայլեր եւ բռնաճնշումներ են սանձազերծել բարձրաստիճան եկեղեցականութեան դէմ։ Գիտէք, որ անազատութեան մէջ են գտնւում երեք սրբազաններ, ազգային մեծ բարերարը եւ այլ հայորդիներ։ Այսօր տեղեկացանք, որ եւս մէկ Սրբազան՝ Արշակ արքեպիսկոպոս Խաչատրեանը ձերբակալւած է կալանքի տանելու համար։
Սիրելիներ, մեր ժողովրդի միասնութեան, հաւատքի եւ առ Եկեղեցին հաւատարմութեան շնորհիւ լիայոյս ենք՝ կը յաղթահարւի այս փորձութիւնը եւ կը չեզոքացւեն չարամիտ այս ոտնձգութիւնները»։
