Արթուր Խաչատրեան. «Փաշինեանն, ըստ էութեան, միջնորդ է Ալիեւի եւ հայ ժողովրդի միջեւ»
«ԱԼԻՔ» – Դեկտեմբերի 11-ին Հրապարակ TV-ի «Հինգշաբթի» հաղորդաշարը հիւրընկալել էր ՀՅԴ անդամ, ՀՀ ԱԺ պատգամաւոր Արթուր Խաչատրեանին: Անդրադարձ է կատարւել Հայաստանի ներքաղաքական կեանքին, Արցախի խնդրին, ինչպէս նաեւ ՀՀ իշխանութիւնների վարած ոչ հայանպաստ եւ պարտւողական արտաքին քաղաքականութեանը:
Արթուր Խաչատրեանը մանրամասներ է ներկայացրել նախօրէին Արցախի ներկայացուցչութիւնում Արցախի Հանրապետութեան Սահմանադրութեան օրւան նւիրւած լսումների, քննարկւած հարցերի մասին: Նա մասնաւորապէս կարեւորել է Արցախ հաւաքական վերադարձի հարցում արցախահայութեան եւ Արցախի գործող իշխանութիւնների միակարծութիւնն ու վճռականութիւնը: «Այդ ներկայացուցչական քննարկումը, որին մասնակցում էին Արցախի գործադիր եւ օրէնսդիր մարմինների ղեկավարները, ԱՀ եւ ՀՀ ԱԺ պատգամաւորներ, քաղաքագէտներ, միջազգային իրաւունքի մասնագէտներ, յայտնի հասարակական եւ քաղաքական գործիչներ, եւս մէկ անգամ ցոյց տւեց, որ Արցախի հարցը վերջնականապէս փակւած չէ եւ արցախահայութեան հաւաքական վերադարձի իրաւունքի պաշտպանութիւնը շարունակում է մնալ այդ խնդրի արծարծման եւ միջազգայնացման կարեւորագոյն գործօն»,- նշել է Արթուր Խաչատրեանը:
Խօսելով ՀՀ վարչապետի՝ Գերմանիայում արած մի շարք յայտարարութիւնների մասին՝ Արթուր Խաչատրեանն անընդունելի է համարել Նիկոլ Փաշինեանի՝ արցախահայութեան վերադարձի իրաւունք եւ Ադրբեջանի կողմից շրջանառւող «Արեւմտեան Ադրբեջան» խօսոյթների միջեւ հաւասարութեան նշան դնելու եւ դրանցից երկուստեք հրաժարւելու առաջարկը, ինչը, ըստ պատգամաւորի, միանշանակ բխում է Ադրբեջանի շահերից: «Երբ Ալիեւը խօսում է ադրբեջանցիների՝ այսպէս կոչւած «Արեւմտեան Ադրբեջան» վերադարձի մասին, դրան պէտք է հակադրել Բաքւի, Սումգայիթի, Մինգեչաուրի, Գանձակի, Շահումեանի շրջանի եւ Նախիջեւանի հայերի վերադարձի հարցը»,- ասել է Արթուր Խաչատրեանը:
Անդրադարձ է կատարւել նաեւ Հայ Առաքելական Սուրբ Եկեղեցու դէմ ՀՀ իշխանութիւնների սանձազերծած արշաւին, որն, ըստ պատգամաւորի, ոչ թէ անձերի դէմ պայքար է, ինչպէս ներկայացնում են իշխանութիւնները, այլ նպատակ է հետապնդում հիմքից քանդել Հայ Եկեղեցին: «Հայ Առաքելական Սուրբ Եկեղեցին, ի տարբերութիւն աշխարհի շատ եկեղեցիների ու կրօնական կազմակերպութիւնների, իր արմատներով ազգային է եւ հանդիսանում է մեր ազգի ինքնութեան ու գէնի ամենակարեւոր բաղկացուցիչը: Այս իմաստով այն լուրջ խոչընդոտ է Հայաստանի անկախութեան եւ պետականութեան հակառակորդների համար»,- նշել է Արթուր Խաչատրեանը:
