Ռիաբկով. «ՌԴ-ն պատրաստ է իրաւաբանօրէն արձանագրել, որ մտադիր չէ յարձակւել ԵՄ-ի եւ ՆԱՏՕ-ի վրայ»
«ԱԼԻՔ» – Ռուսաստանը մտադիր չէ յարձակւել ՆԱՏՕ-ի եւ ԵՄ երկրների վրայ։ Այս մասին ըստ News.am-ի՝ յայտարարել է ՌԴ փոխարտգործնախարար Սերգէյ Ռիաբկովը՝ «Վալդայ» միջազգային քննարկման ակումբի «Ոչստրատեգիական կայունութիւն 2025. միջազգային անվտանգութեան մէկ տարւայ արդիւնքներ» քննարկման ժամանակ։
Նրա խօսքով՝ Ռուսաստանի Դաշնութիւնը չի հետապնդում իրեն վերագրւող ագրեսիւ նպատակները։
Դիւանագէտը նաեւ ուշադրութիւն է հրաւիրել Ռուսաստանի նախագահ Վլադիմիր Պուտինի յայտարարութեան վրայ այն մասին, որ Մոսկւան «նոյնիսկ պատրաստ է դա ամրագրել իրաւաբանօրէն՝ ներկայիս ճգնաժամի պոտենցիալ կարգաւորման համատեքստում՝ հիմնւելով հաւասար եւ անբաժանելի անվտանգութեան սկզբունքի վրայ»։
Նշենք, որ դեկտեմբերի 11-ին ՌԴ ԱԳ նախարար Սերգէյ Լաւրովը յայտարարել էր, որ Ռուսաստանը պատրաստ է գրաւոր ամրագրել, որ ագրեսիւ ծրագրեր չունի ԵՄ եւ ՆԱՏՕ-ի երկրների նկատմամբ։ Նա նշել է, որ Ռուսաստանը պատրաստ է իրաւաբանական փաստաթղթում ամրագրել երաշխիքները, որ չի պատրաստւում յարձակւել ԵՄ-ի եւ ՆԱՏՕ-ի վրայ։ Միեւնոյն ժամանակ նախարարն ընդգծել է, որ դա պէտք է արւի կոլեկտիւ՝ փոխադարձ հիմունքներով։
