Թեհրան․ Արդար բանակցութիւններ՝ այո, պարտադրանք՝ ոչ

ՄԱԿ-ի Անվտանգութեան խորհրդում կայացած վերջին նիստում Միացեալ Նահանգները եւ եւրոպական «եռեակը» շարունակել են քաղաքականացւած եւ անհիմն մեղադրանքներն Իրանի խաղաղ միջուկային ծրագրի դէմ՝ կրկին փորձելով ճնշման լեզւով պարտադրանք թելադրել Թեհրանին-տեղեկացրել է «Թասնիմ»-ը:

Նիստում Մեծ Բրիտանիայի ներկայացուցիչը Իրանից պահանջել է «հաւատարիմ մնալ պարտաւորութիւններին» եւ ուղիղ բանակցութիւններ սկսել ԱՄՆ-ի հետ՝ ակնարկելով, որ միայն այդ դէպքում կարող է քննարկւել պատժամիջոցների թեթեւացումը։ Նոյն շրջանակում Վաշինգտոնի ներկայացուցիչը պնդել է, թէ Անվտանգութեան խորհուրդը պէտք է շարունակի միջուկային խնդրի շուրջ ճնշումներ գործադրել Իրանի նկատմամբ։

Նիստում ելոյթ ունեցաւ նաեւ ԱՄՆ-ի ներկայացուցիչը՝ ընդգծելով, թէ Անվտանգութեան խորհուրդը պարտաւոր է շարունակել ուշադրութիւն դարձնել միջուկային զէնքի չտարածման հարցին՝ մասնաւորապէս Իրանի պարագայում։

Ֆրանսիայի ներկայացուցիչն առանց հիմնաւորումների առաջ է քաշել Իրանի կողմից բազմիցս պարզաբանւած ու հերքւած հին պնդումները, փորձելով Իրանի խաղաղ միջուկային գործունէութիւնը ներկայացնել որպէս միջազգային անվտանգութեան սպառնալիք։

Գերմանիայի ներկայացուցիչը շեշտել է անկախ գնահատումների եւ վերահսկողութեան կարեւորութիւնը, իսկ Եւրոպական Միութեան ներկայացուցիչը, որպէս դիտորդ, պնդել է snapback օրինականութեան մասին՝ միաժամանակ նշելով, որ պատժամիջոցների վերադարձը չպէտք է փակուղի դարձնի դիւանագիտութիւնը։

 

Ռուսաստան, Չինաստան եւ Պակիստան՝ դիւանագիտութեան օգտին

Ռուսաստանի ներկայացուցիչը բացայայտօրէն մերժել է «առաւելագոյն ճնշման» քաղաքականութիւնը՝ ընդգծելով, որ Իրանի միջուկային ծրագիրը խաղաղ բնոյթ ունի։ Չինաստանի ներկայացուցիչը յիշեցրել է, որ միջուկային համաձայնագիրը Արեւմուտքի կողմից է խախտւել եւ շեշտել է՝ խնդիրները չեն լուծւում ուժի կամ սպառնալիքի լեզւով։

Պակիստանի ներկայացուցիչը եւս քննադատել է պատժամիջոցները՝ նշելով, որ դրանք խորացնում են անվստահութիւնը եւ ուղիղ վնաս հասցնում Իրանի ժողովրդին։

 

Իրանի խիստ պատասխանը ԱՄՆ-ին

ԱՄՆ-ի ներկայացուցիչ Մորգան Օրտեգասի յայտարարութիւններին, ըստ որի Վաշինգտոնը կընդունի միայն ուղիղ բանակցութիւններ եւ չի ճանաչում Իրանի ուրանի հարստացման իրաւունքը, խիստ արձագանքել է Իրանի Իսլամական Հանրապետութեան ՄԱԿ-ում մշտական ներկայացուցիչ Ամիր Սայիդ Իրաւանին։

«Իրանը պատրաստ է ցանկացած արդար եւ բովանդակային բանակցութեան, սակայն չի ընդունի «զրոյական հարստացման» քաղաքականութիւնը, որը բացայայտօրէն խախտում է Միջուկային զէնքի չտարածման պայմանագրով նախատեսւած մեր իրաւունքները»,– ընդգծել է Իրաւանին։

Նա յստակ յայտարարել է, որ Թեհրանը զիջումների չի գնայ ճնշման կամ շանտաժի ներքոյ․ «Իրանի Իսլամական Հանրապետութիւնը ոչ կը բանակցի ճնշման ներքոյ, ոչ էլ կնդունի որեւէ քաղաքական պարտադրանք միջազգային հարթակներում»։