«Դեմոկրատական այլընտրանք» կուսակցութիւնը կը միանա՞յ ընդդիմութեանը. Սուրէնեանցը պարզաբանում է

Քաղաքագէտը շեշտել է՝ ընդդիմութեան միասնական ցուցակի մասին խօսակցութիւնները վտանգաւոր են, քանի որ հասարակութիւնը կարող է հիասթափւել։

Sputnik Armenia-ի համաձայն՝ «Դեմոկրատական այլընտրանք» կուսակցութիւնը խորհրդարանական ընտրութիւններում չի միանայ ընդդիմութեանը։ Այս մասին ասուլիսի ժամանակ ասաց «Դեմոկրատական այլընտրանք» կուսակցութեան նախագահ, քաղաքական վերլուծաբան Սուրէն Սուրէնեանցը։

«Հնարաւոր չեմ համարում, որ ընդդիմութիւնը միասնական ցուցակով հանդէս գայ։ Ես էլ այս դիսկուրսի մէջ ընդհանրապէս չեմ մտնի, որովհետեւ ուտոպիաների մասին խօսել չեմ սիրում։ Ի տարբերութիւն իշխանութեան` ընդդիմութիւնը մի կենտրոնից ղեկավարւող հիերարխիկ հիմնարկ չէ, այն բազմաշերտ ու բազմաբեւեռ կատեգորիա է։ Կարծում եմ, որ միասնական ցուցակի մասին խօսակցութիւնները նոյնիսկ վնասակար են, քանի որ հասարակութեան մէջ սպասումներ են ձեւաւորւում, որ շուտով բոլորը կը միաւորւեն։ Հակառակ դէպքում հիասթափութիւններ են սկսում»,- նշեց Սուրէնեանցը։

Նա կոչ արեց, որ որքան էլ ազնիւ մղումներով է խօսւում միասնական ընդդիմութեան մասին, բայց չխօսել այդ մասին։ Վստահ է՝ իշխանութիւնը հետագայում այդ հանգամանքն օգտագործելու է հասարակութեանը յուսահատեցնելու առումով։

Յիշեցնենք` ՀՀ-ում հերթական խորհրդարանական ընտրութիւնները, ըստ նախնական տեղեկութիւնների, կը կայանան 2026 թւականի յունիսին։

-2026-ի ընտրութիւններին մասնակցելու վերաբերեալ արդէն յայտարարութիւն են արել ՀՀ 2-րդ նախագահ Ռոբերտ Քոչարեանը, ՀՀ նախկին ՄԻՊ Արման Թաթոյեանը` իր նորաստեղծ «Միասնութեան թեւեր» նախաձեռնութեամբ, «Մեր ձեւով» շարժումը, որի գաղափարական առաջնորդ` գործարար, բարերար Սամուէլ Կարապետեան կալանքի տակ է յունիսի 18-ից, ինչպէս նաեւ Երեւանի նախկին քաղաքապետ Հայկ Մարութեանը` իր «Նոր ուժ» կուսակցութեամբ։ Ընտրութիւններին մասնակցելու քաղաքական յայտ է ներկայացրել նաեւ ՀԱԿ-ը, որի վարչապետի թեկնածուն Լեւոն Զուրաբեանն է։