Մշակոյթի գերագոյն խորհրդի նիստում նախագահ Փեզեշքիանը պահանջել է առաջնահերթութիւնը տալ ժողովրդի դժգոհութեան արմատների ու խնդիրների վերացմանը:
Երէկ՝ յունւարի 20-ին, նախագահը խորհրդի նիստին, որին մասնակցում էին խորհրդարանի նախագահ Ղալիբաֆը եւ Գլխաւոր դատախազ Մոհսէն Էժէին, վերլուծելով վերջին իրադարձութիւնները, շեշտել է, որ հասարակութեան մէջ դժգոհութեան հիմնական պատճառներից են նաեւ հակառակ կարծիքի նկատմամբ անհանդուրժողականութիւնը, քննադատութիւններին տրւող բացասական եւ անվտանգային մօտեցումները, ինչպէս նաեւ խտրականութիւնը անկախ տոհմային թէ քաղաքակական պատկանելիութիւնից:
Փեզեշքիանը պահանջել է, որ Խորհրդի օրակարգն իր առաջնահերթութիւնը տայ ճշգրիտ եւ սկզբունքային լուծումներ գտնելուն՝ ժողովրդական պահանջներին ու բողոքներին ընթացք տալուն եւ փոխադարձ հասկացութեանը:
Նա նշել է. «Տնտեսութեան, կրթութեան եւ բոլոր միւս ոլորտներում անարդար բաշխումն ու չարդարացւած արտօնութիւնները հանգեցրել են զայրոյթի։ Մենք՝ բոլոր իշխանական մարմինները, պէտք է յատուկ ուշադրութիւն դարձնենք կառավարման այս թերի գործընթացների ուղղմանը»։
Նախագահը նաեւ ընդգծել է, որ հիմնական երեք ինստիտուտների՝ ընտանիքի, դպրոցի եւ ԲՈՒՀ-երի նկատմամբ պարտականութիւնները ժամանակին չկատարելու հետեւանքով են առաջանում նման խնդիրները:
Փեզեշքիանը եզրափակել է՝ եթէ մեր ճանապարհը ճիշտ է, ապա մենք չպէտք է վախենանք քննադատութիւնից, այլ պէտք է գործով ու արդիւնքով մեր երիտասարդութեանը կապենք համակարգին։
Նիստում նաեւ քննարկւել եւ հաւանութեան է արժանացել Արհեստական բանականութեան օլիմպիադաների կարեւորութեան եւ դրանց աջակցելու հարցը, ինչպէս նաեւ քննարկւել է տիեզերագիտութեան զարգացման համապարփակ ծրագրի իրականացման մասին զեկոյցը։
