Արաղչին CNN-ի  հետ զրոյցում. «Հարստացման իրաւունքի յարգման դիմաց պատրաստ ենք կենտրոնանալ մնացած մանրամասների վրայ»

ԱԳ նախարար Սէյէդ Աբբաս Արաղչին յայտարարել է, որ Միացեալ Նահանգների հետ արդար եւ հաւասարակշռւած համաձայնութեան հասնելը հնարաւոր է, եթէ բանակցութիւնները սահմանափակւեն միջուկային հարցով եւ ուղեկցւեն պատժամիջոցների գործնական վերացմամբ։

CNN ամերիկեան հեռուստաալիքին տւած հարցազրոյցում անդրադառնալով ռազմական սրացման վտանգին՝ Արաղչին նշել է, որ պատերազմը անխուսափելի չէ, սակայն այն դէպքում, եթէ այն տեղի ունենայ, աղէտալի հետեւանքներ կունենայ ամբողջ տարածաշրջանի համար։ Նա ընդգծել է, որ Իրանը լիովին պատրաստ է պաշտպանւել, սակայն նպատակը պատերազմը կանխելն է։

 Արաղչին յաւելել է, որ Իրանը երբեք չի ձգտել եւ չի ձգտում միջուկային զէնքի, եւ պատրաստ է բանակցել իր միջուկային ծրագրի շուրջ՝ միջազգային վստահութիւն ապահովելու համար, որպէսզի այն մնայ բացառապէս խաղաղ բնոյթի եւ դառնայ տեւական կայունութեան պատճառ՝ տարածաշրջանում:

Իրանի ԱԳ նախարարը նշել է, որ ներկայումս Իրանի եւ ԱՄՆ-ի միջեւ ուղիղ բանակցութիւններ չեն ընթանում, սակայն շփումները շարունակւում են տարածաշրջանային միջնորդների միջոցով։ Նրա խօսքով՝ այս շփումները մինչ այժմ արդիւնաւէտ են եղել եւ նպաստել են լարւածութեան որոշակի նւազեցմանը։

Միեւնոյն ժամանակ Արաղչին բացայայտօրէն նշել է, որ Թեհրանը կորցրել է վստահութիւնը ԱՄՆ-ի նկատմամբ որպէս բանակցող կողմի, յիշեցնելով, որ Վաշինգտոնը 2015 թւականի միջուկային համաձայնութիւնից միակողմանիօրէն դուրս եկաւ, իսկ 2025-ին բանակցութիւնների ֆոնում Իրանը ԱՄՆ-ի կողմից ենթարկւեց ռազմական յարձակումների։

Արաղչին շեշտել է, որ Իրանի դիրքորոշումը յստակ է. «միջուկային հարցը կարող է լինել բանակցութիւնների միակ օրակարգը, իսկ հրթիռային կարողութիւններն ու տարածաշրջանային քաղաքականութիւնը բանակցութեան թեմա լինել չեն կարող»։ Նրա խօսքով՝ Իրանի համար սկզբունքային է խաղաղ նպատակներով ուրանի հարստացման իրաւունքի ճանաչումը եւ պատժամիջոցների վերացումը։

Նախարարի գնահատմամբ՝ եթէ ամերիկեան կողմը առաջնորդւի նախագահ Թրամփի յայտարարած նպատակի՝ Իրանի կողմից միջուկային զէնք չունենալու սկզբունքով, ապա նոյնիսկ կարճաժամկէտ հեռանկարում հնարաւոր է հասնել համաձայնութեան։

Արաղչիի խօսքով՝ համաձայնութեան ձեռքբերումը կարող է բացել լայն տնտեսական հնարաւորութիւններ ոչ միայն Իրանի եւ ԱՄՆ-ի, այլ նաեւ ամբողջ տարածաշրջանի համար, պայմանով, որ պատժամիջոցները վերացւեն եւ փոխադարձ յարգանքի հիման վրայ տարածւի համագործակցութեան ոգին։