«ԱԼԻՔ» – ԱԳ նախարար Սէյէդ Աբբաս Արաղչին, անդրադառնալով ԱՄՆ-ի եւ սիոնիստական ռեժիմի կողմից Իրանի դէմ իրականացւած յանցագործութիւններին եւ ռազմական գործողութիւններին նշել է, որ դրանք իրականացւել են այն պայմաններում, երբ Թեհրանի եւ Վաշինգտոնի միջեւ համաձայնութիւնն առջեւում էր, եւ ընդգծել է. «Դոնալդ Թրամփի պայթեցրածը բանակցութիւնների սեղանն էր»։
«ՄԵՀՐ» լրատւական գործակալութեան համաձայն՝ Սէյէդ Աբբաս Արաղչին ABC հեռուստաալիքին տւած հարցազրոյցում նշել է. « Մինչեւ այս հարցազրոյցը ես շեշտել էի, որ համաձայնագիրն իրականութիւն դարձնելու շեմին էինք։ Մենք Ժնեւը թողեցինք այն համատեղ փոխըմբռնմամբ, որ յաջորդ հանդիպման ժամանակ կստորագրւի փոխշահաւէտ համաձայնագիրը։ Սակայն նրանք, ում առաջադրանքը դիւանագիտութեան տապալումն էր, յաջողեցին իրենց առաջադրանքն իրականութիւն դարձնել: Ի վերջոյ, հէնց Դոնալդ Թրամփն էր, որ երկրորդ անգամ հրաման արձակեց պայթեցնել բանակցութիւնների սեղանը»։
