Գարեգին Բ. Այսօր մեր ժողովուրդը կանգնած է արտաքին եւ ներքին մարտահրաւէրների առջեւ

Համաժողովի յարգարժան մասնակիցներ, համայն հայութեան հոգեւոր կենտրոն, աստւածակառոյց Մայր Աթոռ Սուրբ Էջմիածնից, հայրապետական մեր օրհնութիւնն ենք յղում Սփիւռքի զօրաշարժի համաժողովի մասնակիցներիդ։ Ողջունում ենք կարեւոր այս նախաձեռնութիւնը, որը կոչւած է քննարկելու մեր ազգի առջեւ ծառացած ծանր եւ դժւարին հիմնախնդիրները, յստակեցնելու դրանց դիմագրաւման ուղիներն ու մեր համազգային առաջնահերթութիւնները, վերարժեւորելու Հայաստան-Սփիւռք յարաբերութիւնները։

Այսօր մեր ժողովուրդը կանգնած է արտաքին եւ ներքին մարտահրաւէրների առջեւ։ Խորը մտահոգութիւն են առաջ բերում մեր ազգային կեանքում պառակտւածութիւնը, ատելութեան սերմանումը, ազգային կառոյցների թիրախաւորումը, Հայաստան-Սփիւռք յարաբերութիւնների խաթարւած վիճակը։ Եկեղեցու, հայկական բոլոր կազմակերպութիւնների նպատակը նոյն է՝ համախմբել ազգային ներուժը, անվտանգ եւ ապահով դարձնել համայն հայութեան հայրենիքը, բարւոքել Հայաստան-Սփիւռք գործակցութիւնը, անխաթար պահպանել ազգային ինքնութիւնը։

Համաժողովին մասնակից աւանդական կազմակերպութիւնները, ազգային միութիւններն ու գործիչները, որոնք ներկայացնում են հայութեան տարբեր հատւածներ, մեր Ս․ Եկեղեցու օրհնութեան ներքոյ անժխտելի ներդրում են ունեցել հայոց անկախ պետականութեան վերականգնման եւ Սփիւռքի կենսունակութեան պահպանման նւիրական գործում։ Անբեկանելի ճշմարտութիւն է, որ հայութեան եւ հայկականութեան յարատեւութեան երաշխիքը լեզուն, հաւատքը ազգային դպրոցն է, հայրենի, անկախ ու ինքնիշխան պետութիւնը, որի յատուկ հոգածութեան եւ ուշադրութեան ներքոյ պիտի գտնւեն նաեւ Սփիւռքը եւ Սփիւռքի առաջնային կարիքները։ Եւ հետեւաբար, հայոց պետութեան պահպանութիւնն ու զօրացումը այսօր էլ աշխարհասփիւռ մեր ժողովրդի առաջնային յանձնառութիւնն է։ Հարկ է հոգ տանել նաեւ, որ իւրաքանչիւր հայ չտրւելով օտար գաղափարների եւ ազդեցութիւնների, շարունակի իր ողջ էութեամբ եւ հոգով դաւանած արժէքներով կապւած մնալ իր ազգին եւ հայրենիքին եւ իր կարողութիւններն ու շնորհները ի սպաս դնի մեր ժողովրդի եւ հարազատ երկրի առաջընթացին։

Պատմական տարբեր հանգամանքների բերումով աշխարհի տարբեր երկրներում ձեւաւորւած Սփիւռքի համայնքների կազմակերպութիւնները պէտք է միասնական ուժի եւ զօրութեան վերածենք, յանուն ազգի եւ հայրենիքի շահերի պաշտպանութեան։ Յիրաւի, տկար կը լինի հայրենիքը առանց Սփիւռքի զօրակցութեան եւ նւիրումի: Թոյլ ու խոցելի կը լինի Սփիւռքը առանց հզօր եւ պայծառ հայոց պետութեան։ Միայն Հայաստան-Սփիւռք փոխադարձ աջակցութեամբ է հնարաւոր հաստատուն ու բարօր պահել մեր ժողովրդի կեանքը, հիմնւած նախնեաց սրբազան ժառանգութեան եւ միեւնոյն արժեհամակարգի վրայ։

Այս առումով, սիրելիներ, կարեւոր առաքելութիւն ունեն Հայաստանեայց Առաքելական Ս․ Եկեղեցին, ազգային մեր կառոյցներն ու հաստատութիւնները, որպէսզի երբեք չտկարանայ ու չխամրի աշխարհասփիւռ հայոց ազգային հոգեւոր ինքնութիւնը եւ անսասան մնայ հայոց պետութիւնը։ Անհրաժեշտ է վերիմաստաւորել ազգային կեանքի մերօրեայ ընթացքները եւ համախոհութեան մէջ գործուն միջոցներ ձեռնարկել, կասեցնելու հայրենավնաս ազգակործան երեւոյթները։ Այսպիսի համաժողովներն ու խորհրդակցութիւնները կարեւոր քայլ են վերոյիշեալ հիմնախնդիրների յաղթահարման եւ լուծման ճանապարհին։

Զատկական այս օրերին, հայրապետիս աղօթքն է, որ բարձրեալ Աստւած իմաստութիւն շնորհի պետութիւնների ղեկավարներին՝ խաղաղութիւնը վերահաստատելու աշխարհում եւ մարդկութեան կեանքում։ Թող փրկիչ մեր Տէրը ապահով եւ անվտանգ պահպանի հայրենի մեր երկիրը, իր սուրբ յարութեան լոյսով պայծառացնի համայն մեր ժողովրդին, անշեղօրէն ընթանալու աստւածահաճոյ, բարեբեր ուղիներով եւ տէրունաւանդ հաւատով կերտելու հայոց նորոգեալ կեանքն ու լուսաւոր գալիքը։

Մեր գնահատանքն ենք բերում համաժողովի աշխատանքների կազմակերպիչներին եւ բոլոր մասնակիցներին եւ մաղթում արդիւնաւոր ընթացք։