«Հայաստան» դաշինք. Փաշինեանի յայտարարութիւններն իր «յաղթանակի» եւ միանձնեայ իշխանութիւն ձեւաւորելու վերաբերեալ վերածւում են իշխանութեան իւրացման քայլի
Փաշինեանի յայտարարութիւններն իր «յաղթանակի» եւ միանձնեայ իշխանութիւն ձեւաւորելու վերաբերեալ վերածւում են իշխանութեան իւրացման քայլի։ Այս մասին ասւած է «Հայաստան» դաշինքի տարածած յայտարարութեան մէջ։
«Սիրելի՛ հայրենակիցներ,
Այս պահին «Հայաստան» դաշինքի կենտրոնական շտաբը եւ մեր վստահւած անձինք ողջ հանրապետութիւնում զբաղւած են ընտրատեղամասերից ստացւող տւեալների ամփոփմամբ։
Յիշեցնենք, որ Կենտրոնական ընտրական յանձնաժողովն այս պահի դրութեամբ ամփոփել է ընտրատեղամասերի միայն մէկ քառորդի (25%-ի) արդիւնքները։
Այս պայմաններում Նիկոլ Փաշինեանի յայտարարութիւններն իր «յաղթանակի» եւ միանձնեայ իշխանութիւն ձեւաւորելու վերաբերեալ վերածւում են իշխանութեան իւրացման, ԿԸՅ-ն փոխարինելու եւ նրա գործունէութեան նկատմամբ կոպիտ միջամտութիւն իրականացնելու յանցաւոր քայլի։
Առանց վերջնական արդիւնքների՝ դատական համակարգին եւ պետական ատեաններին հրահանգաւորելու եւ սպառնալու փոխարէն, գործող վարչախումբը դեռ պէտք է իրաւական պատասխան տայ այս ընթացքում արձանագրւած բոլոր ընտրախախտումների, վարչական ռեսուրսի կոպիտ կիրառման եւ քաղաքացիների կամարտայայտման վրայ գործադրւած բռնաճնշումների համար։
Ընտրութիւնների վերջնարդիւնքների, մեր հետագայ քայլերի եւ անելիքների մասին հանրութեանը կը տեղեկացնենք պաշտօնական եւ ամբողջական տւեալներն ամփոփելուց յետոյ»։
