Արցախի Հանրապետութեան պետնախարար Նժդեհ Իսկանդարեանը յայտարարութիւն է տարածել.
«Հայաստանում տեղի ունեցած ընտրութիւնները, ցաւօք, չանցան այնպիսի պայմաններում, որոնք լիարժէք վստահութիւն կը ներշնչէին հասարակութեանը։ Ընտրական գործընթացը ուղեկցւեց վարչական ճնշումների, ընտրախախտումների, քաղաքական հետապնդումների, ձերբակալութիւնների եւ վախի մթնոլորտի մասին բազմաթիւ ահազանգերով։
Միեւնոյն ժամանակ, այս ընտրութիւններն ընդգծեցին եւս մէկ կարեւոր խնդիր. տասնեակ հազարաւոր արցախցիներ փաստացի զրկւած էին ընտրութիւններին մասնակցելու հնարաւորութիւնից։ Աւելի քան 50 հազար արցախցիներ, որոնք ունեն նոյն կապոյտ անձնագրերը եւ շարունակում են ապրել Հայաստանի Հանրապետութիւնում, չեն կարողացել իրացնել իրենց ընտրական իրաւունքը՝ իրաւական կարգաւորումների հետեւանքով։
Սակայն անկախ ընտրութիւնների արդիւնքներից եւ նրանից, թէ ով է ձեւաւորելու իշխանութիւնը, Արցախի հարցը եւ արցախցիների իրաւունքների պաշտպանութեան հարցը փակւած չեն եւ չեն կարող փակւած համարւել։ Տեղահանւած ժողովրդի հաւաքական իրաւունքները, անվտանգ ու արժանապատիւ կեանքի, հայրենիք վերադառնալու եւ սեփական ճակատագիրը տնօրինելու իրաւունքները շարունակում են մնալ օրակարգային։
Հետեւաբար, Արցախի հարցի նկատմամբ հետեւողականութիւնը պէտք է լինի ոչ միայն իշխանութիւնների, այլեւ քաղաքական բոլոր ուժերի, այդ թւում՝ ընդդիմութեան պատասխանատւութեան շրջանակում։ Արցախի հարցը չի կարող դառնալ ընտրութիւններից ընտրութիւններ յիշւող թեմա. այն պահանջում է մշտական եւ հետեւողական աշխատանք։
Միաժամանակ, մենք պէտք է շարունակենք քննարկել եւ ձեւաւորել այն մեխանիզմները, որոնք կապահովեն արցախահայութեան ինքնակազմակերպւածութիւնն ու ներկայացւածութիւնը։ Արցախի պետական ինստիտուտների պահպանման եւ ամբողջացման հարցը շարունակում է մնալ կարեւոր։ Արցախի ժողովրդի համար պէտք է յստակ լինի, որ իրենց հաւաքական կամքն ու ներկայացւածութիւնը կարող են արտայայտւել նաեւ կազմակերպւած քաղաքական եւ ինստիտուցիոնալ ձեւերով, ներառեալ ապագայում համապատասխան ընտրական գործընթացների անցկացումը։
Արցախի ժողովրդի պայքարը չի աւարտւել։ Այն շարունակւում է՝ յանուն իրաւունքների, արժանապատւութեան եւ արդարութեան»։
