Ընտրութիւնների արդիւնքում արձանագրւած երկու կարեւոր փաստի հետ Փաշինեանը չի ուզում հաշւի նստել
«Ընտրութիւնների արդիւնքում արձանագրւած երկու կարեւոր փաստի հետ Նիկոլ Փաշինեանը որեւէ կերպ չի ուզում հաշւի նստել եւ համակերպւել։ Առաջինը, չնայած աննախադէպ, լայնածաւալ արտաքին աջակցութեան կամ տւեալ դէպքում միջամտութեան, չնայած պետական վարչական ռեսուրսի աննախադէպ կիրառման եւ բազմաթիւ ապօրինութիւնների, Նիկոլ Փաշինեանը չկարողացաւ ստանալ մեր ժողովրդի ձայների 50%-ը, եւ երկրորդ՝ հանգամանքը, չնայած աննախադէպ բռնաճնշումների, ապօրինութիւնների, ընտրակեղծիքների, ֆիզիկական եւ տեղեկատւական տեռորի, խորհրդարանական շեմը յաղթահարող ընդդիմադիր ուժերը կարողացան արձանագրել շուրջ 550000 քւէ։
Հիմա այս փաստի հետ Փաշինեանը չի համակերպւում եւ յայտարարում է, որ ընդդիմութեան ձայները կեղծւած են եւ ընդդիմութիւնը լեգիտիմ չի, այդ ձայները ձեռք է բերել ընտրակաշառքով։ Ուրեմն լսի՛ր Նիկոլ Փաշինեա՛ն, այս երկրում եթէ կայ մի ընտրակեղծարար, դա դո՛ւ ես։ Եթէ կայ մի ոչ լեգիտիմ սուբիեկտ, դա դո՛ւ ես եւ քո քաղաքական թիմը։ Հետեւաբար ուզես թէ չուզես այս փաստի հետ հաշւի ես նստելու։
Իսկ ընդհանրապէս, սիրելի ժողովուրդ, այս ձեռագիրը նոյն ձեռագիրն է, բան չի փոխւել իրենց մօտ, յանձնել Արցախը, ասել, որ նախկիններն են արել, կեղծել ընտրութիւնները, մեղքը բարդել ընդդիմութեան վրայ, եւ այս ամէն ինչի իմաստը ո՞րն է, շարունակ խուսափել պատասխանատւութիւնից, շարունակ մեղքը բարդել այլոց վրայ… Չի ստացւելու, այս ճանապարհով որեւէ արդիւնքի չէք հասնելու, ուզէք, թէ չուզէք, դուք հաշւի էք նստելու մեր ժողովրդի մեծամասնութեան կարծիքի հետ, իսկ մեծամասնութիւնը ձեր օգտին չի, առնւազն մեծամասնութիւնը ձեզ չի քւէարկել, եւ չնայած այդքան ճնշումների ու յանցագործութիւնների, կէս միլիոնից աւել մարդ քւէարկել է ընդդիմութեանը»,- իր տեսաուղերձում յայտարարել է ՀՅԴ Հայաստանի ԳՄ ներկայացուցիչ Իշխան Սաղաթէլեանը։
