Ամենայն Հայոց Կաթողիկոսը եւ մշակոյթի մի խումբ գործիչներ քննարկել են Հայաստանում ստեղծւած հասարակական-քաղաքական իրավիճակը, ներհասարակական կեանքում արձանագրւող ցաւալի զարգացումները
Մայիսի 16-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսն ընդունեց մշակոյթի մի խումբ գործիչների, ովքեր այցելել էին Մայր Աթոռ Սուրբ Էջմիածին՝ իրենց զօրակցութիւնը, որդիական սէրն ու հաւատարմութիւնը յայտնելու Սուրբ Եկեղեցուն եւ Ամենայն Հայոց Հայրապետին։ Այս մասին յայտնում են Մայր Աթոռից։
Հանդիպմանն անդրադարձ կատարւեց Հայաստանում ստեղծւած հասարակական-քաղաքական իրավիճակին, ներհասարակական կեանքում արձանագրւող ցաւալի զարգացումներին ու մարտահրաւէրներին, ինչպէս նաեւ Եկեղեցի-պետութիւն յարաբերութիւնների ներկայ մտահոգիչ ընթացքին։
Զրոյցի ընթացքում կարեւորւեց Հայ Առաքելական Սուրբ Եկեղեցու աստւածահաստատ, պատմական եւ հոգեխնամ բացառիկ առաքելութիւնը՝ ազգային ինքնութեան պահպանման, հասարակութեան հոգեւոր զօրացման եւ համազգային միաբանութեան ամրապնդման գործում։
Առանձնակի շեշտւեց Հայոց Եկեղեցու եւ հայ մտաւորականութեան յանձնառութիւնը արժէհամակարգային ճգնաժամի յաղթահարման, հանրային համերաշխութեան ձեւաւորման, ինչպէս նաեւ հասարակութեան մէջ հոգեւոր-բարոյական առողջ մթնոլորտի եւ սիրոյ ու միաբանութեան ոգու զօրացման ուղղութեամբ։
