Իսլամաբադի փոխըմբռնման յուշագիրը՝ Միջուկային բանակցութիւնների նոր փուլ

Իրանի եւ ԱՄՆ-ի միջեւ Իսլամաբադում ստորագրւած փոխըմբռնման յուշագիրն ըստ իրանական կողմի, միջուկային ծրագրի շուրջ բանակցութիւնները տեղափոխում է նոր փուլ՝ 60-օրեայ ժամկէտ սահմանելով համապարփակ համաձայնութեան հասնելու համար։

Յուշագրի առանցքային դրոյթներից մէկը վերաբերում է Իրանի միջուկային ծրագրին։ Փաստաթղթում Իրանը վերահաստատում է, որ չի արտադրելու եւ ձգտելու միջուկային զէնքի։ Միեւնոյն ժամանակ կողմերը համաձայնել են հարստացւած ուրանի պաշարների հարցը լուծել փոխադարձ համաձայնեցւած մեխանիզմով: Վաշինգտոնը հրաժարւել է իրանական ուրանը ԱՄՆ տեղափոխելու պահանջից՝ ընդունելով դրա նոսրացումը Իրանում՝ ՄԱԳԱՏԷ-ի վերահսկողութեամբ։

Փոխըմբռնման յուշագրով մինչեւ վերջնական համաձայնութիւն ձեռք բերելը պահպանւելու է ներկայ իրավիճակը․ Իրանը չի փոխի իր միջուկային ծրագրի ներկայ վիճակը, իսկ ԱՄՆ-ը նոր պատժամիջոցներ չի սահմանելու եւ լրացուցիչ ռազմական ուժեր չի տեղակայելու տարածաշրջանում։

Իրանի արտաքին քաղաքական ղեկավարութիւնը շեշտում է, որ միջուկային հարցով հետագայ որեւէ համագործակցութիւն ուղղակի կապւած է պատժամիջոցների վերացման հետ։ Ըստ համաձայնութեան՝ Վաշինգտոնը պարտաւորւում է փուլային կարգով դադարեցնել Իրանի նկատմամբ կիրառւող տարբեր տեսակի սահմանափակումները, ներառեալ ՄԱԿ-ի եւ միակողմանի ամերիկեան պատժամիջոցները։

Սէյէդ Աբբաս Արաղչին յայտարարել է, որ պատերազմի պայմաններում միջուկային թեմայով բանակցութիւնները հնարաւոր չէին, ուստի այդ հարցը յետաձգւեց երկրորդ փուլ։

Իսկ Մոհամմադ Բաղեր Ղալիբաֆը նշել է, որ բանակցութիւններում միջուկային թեմայի ընդգրկումը «նահանջ չէ, այլ քաղաքական իրատեսութիւն եւ ճկունութիւն»։

Իրանական գնահատմամբ՝ Իսլամաբադի յուշագրի միջուկային դրոյթները ոչ թէ վերջակէտ են, այլ դիւանագիտական նոր փորձութեան սկիզբ, որտեղ հիմնական հարցը կը լինի՝ արդեօք ԱՄՆ-ը կը պահպանի՞ իր ստանձնած պարտաւորութիւնները։