Եզրաս Սրբազանի ուղերձը. «Մենք չենք կարող արժէզրկել մեր ձայնը. մեր պարտքն է մասնակցել ընտրութիւններին եւ կործանումից փրկել մեր հայրենիքն ու պետականութիւնը»
Ռուսաստանի եւ Նոր Նախիջեւանի Հայոց թեմի առաջնորդ Եզրաս արքեպիսկոպոս Ներսիսեանի ուղերձը.
«Սիրելի հայորդիներ,
ինչպէս գիտէք յունիսի 7-ին Մայր Հայրենիքում տեղի են ունենալու վճռորոշ ընտրութիւններ, որով կանխորոշւելու է մեր հայրինիքի ու հայոց պետականութեան լինել-չլինելու հարցը։
Կանգնած ենք գոյաբանական սահմանագծին…
Ուստի իւրաքանչիւրս, որպէս հոգացաւ ու ազգասէր քրիստոնեայ հայ, որպէս պատասխանատու, օրինայարգ քաղաքացի, մեր սրբազան պարտքն է եւ իրաւունքը անվերապահօրէն մասնակցել խորհրդարանական ընտրութիւններին, որով կը փրկենք մեր ինքնութեան հիմնասիւները, մեր ազգային սրբութիւնները, մեր հայրենիքն ու պետականութիւնը կործանումից։
Անտարբերութեամբ չմեղանչենք, որպէսզի հետագայում ստիպւած չլինենք գլխիկոր խոստովանելու մեր զաւակներին մեր մեղքը, որ 2026 թւականի ընտրութիւններին մեր իսկ անտարբերութեան պատճառով մեր հայրենիքում չզրկւեցինք հայկական անձնագրից, ինչպէս արցախահայերը՝ Արցախում։
Մենք չենք կարող արժէզրկել մեր ձայնը, որովհետեւ հէնց այդ ձայների հանրագումարով պիտի պաշտպանենք մեր հաւատն ու Մայր Եկեղեցին կեղծ բարենորոգիչներից։
Ուրեմն՝ ի գործ, դէպի ընտրատեղամաս, կատարենք ընտրութիւն յանուն Հայաստանի յարատեւութեան, յանուն ուժեղ հայրենիքի, յանուն հայի ինքնութեան պահպանման, արդարութեան ու համերաշխութեան հաստատման եւ ազգային արժանապատւութեան վերականգնման։
Ես անվերապահօրէն վստահում եմ մեր ազգի իմաստուն ու արդարամիտ զաւակաց, հոգեւոր-ազգային արժէքների, հայրենիքի ու Մայր եկեղեցու նկատմամբ նրանց հաւատարմութեանը եւ խղճմտոք ընտրութեանը։
Աստծոյ օրհնութիւնն ու օգնականութիւնը ամենքիս առաջիկայ վճռորոշ ընտրութիւններին.
Ամէն»։
