Իրանի խորհրդարանի 180 պատգամաւորների յայտարարութիւնը․ Ընդգծւել է Հորմոզի նեղուցի կառավարումն ու ԱՄՆ-ի հետ փոխըմբռնման աւարտը
Իրանի Իսլամական Հանրապետութեան խորհրդարանի շուրջ 180 պատգամաւորներ համատեղ յայտարարութեամբ ընդգծել են նահատակւած առաջնորդի արեան վրէժի հետապնդումը, ԱՄՆ-ի հետ ձեռք բերւած փոխըմբռնման աւարտը, բանակցութիւնների ուսումնասիրութեան յատուկ յանձնաժողովի ստեղծումը, Հորմոզի նեղուցի կառավարման մասին օրէնքի ընդունումը, ինչպէս նաեւ զինւած ուժերին համակողմանի աջակցութիւնը։
Նրանք նաեւ երկրի երեք իշխանութիւնների ղեկավարներին կոչ են արել վերջին զարգացումների պայմաններում որդեգրել վճռական եւ իրավիճակին համարժէք դիրքորոշումներ։
Pars Today-ի հաղորդմամբ՝ յայտարարութեան մէջ պատգամաւորները նշել են, որ խորհրդարանի նահատակւած առաջնորդի արեան վրէժի հետապնդման ճանապարհին չի խնայի որեւէ ջանք, ծրագրաւորում կամ գործնական քայլ։ Յայտարարութիւնը ստորագրած պատգամաւորները նաեւ խորհրդարանի նախագահութեանը կոչ են արել հնարաւորինս շուտ ձեւաւորել բանակցութիւնների եւ ձեռք բերւած փոխըմբռնումների ուսումնասիրութեան, ինչպէս նաեւ Իսլամական յեղափոխութեան առաջնորդի պայմանների կատարման վերահսկողութեան յատուկ յանձնաժողով։
Պատգամաւորները նաեւ յայտնել են, որ խորհրդարանի օրակարգում ընդգրկւելու են երկրի պաշտպանական դոկտրինի ամրապնդմանն ուղղւած իրաւական միջոցառումները եւ Հորմոզի նեղուցի կառավարման ու ինքնիշխանութեան մասին օրէնքի ընդունումը։
Բացի այդ, պատգամաւորները, բարձր գնահատելով Իրանի Իսլամական Հանրապետութեան զինւած ուժերի գործունէութիւնը, վերահաստատել են խորհրդարանի լիակատար աջակցութիւնը այդ ուժերի կարիքների ապահովմանն ու նրանց աջակցութեանը, յատկապէս Հորմոզի նեղուցում Իրանի ինքնիշխան իրաւունքների իրացման հարցում։
