Ամենայն Հայոց Կաթողիկոսը ընդունեց «Ուժեղ Հայաստան» եւ «Հայաստան» խմբակցութիւնների պատգամաւորներին

Օգոստոսի 2-ին Ն․Ս․Օ․Տ․Տ Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ազգային ժողովի 9-րդ գումարման «Ուժեղ Հայաստան» եւ «Հայաստան» խմբակցութիւնների պատգամաւորներին։

Նորընտիր պատգամաւորների անունից Նորին Սրբութեանը ողջունեցին խմբակցութիւնների ղեկավարներ տիար Նարեկ Կարապետեանն ու տիկին Աննա Գրիգորեանը:

«Ուժեղ Հայաստան» խմբակցութեան ղեկավար Նարեկ Կարապետեանը իր խօսքում նշեց. «Չնայած օրէնսդրութեամբ սահմանւած կարգաւորմանը, որ Ազգային ժողովի առաջին նստաշրջանի բացմանը ելոյթի իրաւունք վերապահւած է Ամենայն Հայոց Կաթողիկոսին, այն չէր ապահովւել: Այդ իսկ պատճառով «Ուժեղ Հայաստան» խմբակցութիւնը եկել է Մայր Աթոռ` օրհնութիւն ստանալու Ամենայն Հայոց Կաթողիկոսից»։

«Հայաստան» խմբակցութեան ղեկավար Աննա Գրիգորեանն արձանագրեց, որ իբրեւ Հայոց Եկեղեցու զաւակներ եւ նաեւ ՀՀ բարձրագոյն օրէնսդիր մարմնի պատգամաւորներ, իրենց հոգեւոր պարտքն էր այսօր այցելել Վեհափառ Հայրապետին։ «Ցաւօք, այս իշխանութեան ապազգային արշաւի պայմաններում, երբ առաջին անգամ մեր պետութեան պատմութեան մէջ Վեհափառի պատգամը, աղօթքն ու մաղթանքը չլսւեց ԱԺ անդրանիկ նիստում, պարտաւոր էինք սրբագրել կատարւածը»,- ընդգծեց նա։

Այնուհետեւ Ամենայն Հայոց Կաթողիկոսն իր ողջոյններն ու օրհնութիւնը փոխանցեց պատգամաւորներին՝ ընդգծելով, որ յայտնի պատճառներով հնարաւորութիւն չի ունեցել ըստ սահմանւած կարգի եւ ձեւաւորւած աւանդութեան մասնակցելու Ազգային ժողովի անդրանիկ նիստին եւ բերելու պատգամաւորներին Սուրբ Էջմիածնի օրհնութիւնը եւ Հայրապետական իր պատգամը։

Վեհափառ Հայրապետն ի մասնաւորի խօսեց երկրում եւ ազգային կեանքում տիրող մտահոգիչ կացութեան եւ առկայ ծանր հիմնախնդիրների մասին։

«Այսօր մեր երկրի առջեւ ծառացած արտաքին եւ ներքին մարտահրաւէրները ենթադրում են նոր փորձութիւններ, որոնց յաղթահարման հնարաւոր ուղիները պահանջում են առաւելագոյն ջանքեր, պետական ու ազգային կառոյցների, մասնագիտական տարբեր ասպարէզներում քաջահմուտ գործիչների համախմբւածութիւն։ Այս իրավիճակի հանդիման մեծապէս մտահոգիչ են նաեւ ներազգային կեանքում տիրող անհամերաշխութիւնը, ջլատիչ վնասաբեր գործողութիւնները, հասարակութեան պառակտւածութիւնը, քաղաքական բեւեռացումը, նւիրական արժէքների եւ ընկալումների աղաւաղումը, նաեւ Հայոց Եկեղեցու դէմ գործադրւող օրինազանց, հակասահմանադրական քայլերը, որոնք խոչընդոտում են Եկեղեցու արդիւնաւոր առաքելութիւնը ազգային անդաստանում։ Նման անընդունելի երեւոյթները խարխլում են ազգային միաբանութեան հիմքերը, Սփիւռք-Հայաստան յարաբերութիւնները, խաթարում հանրութեան մէջ փոխադարձ յարգանքի եւ վստահութեան մթնոլորտը, ժողովրդավարութեան եւ օրինականութեան ամրապնդումը, արդարութեան ու ճշմարտութեան գերակայութիւնը»,- նշեց Վեհափառ Հայրապետը։

Նորին Սրբութիւնն իր խօսքում նաեւ ընդգծեց. «Մենք մէկ ազգ, մէկ հայրենիք, մէկ Եկեղեցի ենք, եւ այս ամբողջութիւնն է յուսալի ապաւէնը աշխարհասփիւռ մեր ժողովրդի գոյատեւման ու յարատեւութեան եւ իղձերի մարմնաւորման։

Հայաստանեայց Առաքելական Սուրբ Եկեղեցին իր բազմադարեայ ծառայութեան ընթացքում միշտ սատար է եղել ազգին ու հայրենիքին, պետականութեան առկայութեան պայմաններում նաեւ աջակից եղել իշխանութիւններին՝ կերտելու հզօր ու բարեկեցիկ երկիր եւ իրականութիւն դարձնելու երջանիկ ապագայի ազնիւ յոյսերը»։ Վեհափառ Հայրապետը շեշտեց, որ Եկեղեցին պիտի շարունակի իր կարողութիւններով զօրավիգ լինել հայոց պետութեանը բոլոր բարի իրագործումներում՝ միտւած մեր ազգի բարօրութեան ու առաջընթացի ապահովմանը, հայրենիքի զօրացմանն ու պայծառութեանը։

Ազգային ժողովի 9-րդ գումարման աշխատանքների մեկնարկի կապակցութեամբ Ամենայն Հայոց Կաթողիկոսը յորդորեց նորընտիր պատգամաւորներին օրէնսդիր առաքելութեան մէջ լինել նախանձախնդիր, հաւատարիմ իրենց կոչմանը եւ յանձնառութիւններին՝ գործել յանուն հայրենիքի անվտանգութեան, հայոց անկախ պետականութեան զօրացման եւ ի բարօրութիւն ժողովրդի։ Նորին Սրբութիւնը նաեւ պատգամեց առաջնորդւել ազգային համընդհանուր նպատակների իրագործման բարձր գիտակցութեամբ, ժողովրդին օրինակ ծառայել արդարամտութեամբ, պարկեշտութեամբ եւ ազնւութեամբ։

Հանդիպման աւարտին Նորին Սրբութիւնը հայցեց Երկնաւորից խաղաղ պահել հայոց պետութիւնը, համախումբ ու անխռով՝ աշխարհասփիւռ հայ ժողովրդին եւ պատգամաւորներին մաղթեց արդիւնաւոր աշխատանք՝ ի նպաստ մեր երկրի բարգաւաճման ու առաջընթացի։

Վերջում Վեհափառ Հայրապետն իր գնահատանքն արտայայտեց խմբակցութիւնների պատգամաւորներին Հայոց Եկեղեցու հանդէպ դրսեւորած նւիրումի եւ որդիական սիրոյ համար յատկապէս դժւարին այս շրջանում, երբ տակաւին շարունակւում են իշխանութիւնների կողմից սանձազերծւած արշաւն ու բռնաճնշումները, երբ ի պաշտպանութիւն Սուրբ Էջմիածնի արտայայտութեան համար առ այսօր կալանքի տակ է մնում ազգային բարերար տիար Սամուէլ Կարապետեանը։

Հանդիպումն աւարտւեց «Պահպանիչ» աղօթքով։

Մայր Աթոռ Սուրբ Էջմիածին