«Իրական Հայաստան»-ից՝ «Իրական Սփիւռք». «Ազդակ»-ը ահազանգում է Սփիւռքի կազմաքանդման նոր օրակարգի մասին
Հայաստանի իշխանութեան ներկայացուցչի՝ Սփիւռքի դերակատարութեան վերաբերեալ յայտարարութիւնները «Ազդակ»-ը դիտարկում է «Իրական Հայաստան» գաղափարախօսութեան տրամաբանութեան շարունակութիւն եւ Սփիւռքի համար նոր օրակարգ ձեւաւորելու փորձ։ Հրապարակման համաձայն՝ Սփիւռքի դերը փորձում են սահմանափակել կամ Հայաստան վերադառնալու, կամ Հայաստանի կառավարութեան օրակարգին ծառայելու շրջանակում՝ դուրս մղելով պատմական Սփիւռքի կառոյցներն ու կազմակերպութիւնները։ «Ազդակ»-ն այս մօտեցումը հակադրում է ՀՀ Սահմանադրութեան 19-րդ յօդւածով ամրագրւած՝ Սփիւռքի հետ համակողմանի կապերի եւ հայապահպանութեան քաղաքականութեանը։
Լիբանանի ՀՅԴ օրգանը 18 օգոստոսին հրապարակած խմբագրականում գրել է, որ այս մօտեցման մէջ դուրս է մղւել յետցեղասպանական դասական Սփիւռքը՝ իր կազմակերպութիւններով եւ կառոյցներով, եւ Սփիւռքի դերակատարութիւնը սահմանափակւում է Հայաստանի կառավարութեան օրակարգով։
«Ազդակ»-ի գնահատմամբ՝ Սփիւռքի դերակատարութիւնը միայն կառավարութեան օրակարգին աջակցելով սահմանափակելը չի համապատասխանում Սահմանադրութեան այս դրոյթներին։ Հրապարակման մէջ չի բացառւում նաեւ, որ Սփիւռքի համար սահմանւող այս երկու գործառոյթները կարող են հետագայում արտացոլւել նոր Սահմանադրութեան նախագծում։
Անդրադառնալով իշխանութեան ներկայացուցչի այն արտայայտութեանը, թէ Սփիւռքը չունի մէկ «հեռախօսահամար», որի միջոցով հնարաւոր լինի դիմել ամբողջ Սփիւռքին, «Ազդակ»-ը նշում է, որ Սփիւռքն ունի բազմաթիւ կազմակերպութիւններ եւ կառոյցներ, որոնք տասնամեակներ շարունակ զբաղւել են հայապահպանութեամբ, կրթութեամբ, մշակոյթով եւ Հայ Դատի աշխատանքով։
