Վեհափառ. «Կրթութիւնը անհատի առջեւ բացում է աստւածճանաչողութեան ճանապարհը, դաստիարակում գիտակից ու պատասխանատու քաղաքացիներ»
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի շնորհաւորական ուղերձը գիտելիքի, գրի եւ դպրութեան օրւայ առիթով.
«Գիտելիքի, գրի եւ դպրութեան օրւայ առիթով շնորհաւորում ենք կրթօջախների սաներին ու մանկավարժներին, կրթութեան բոլոր մշակներին եւ յղում Հայրապետական Մեր սէրն ու օրհնութիւնը։
Կրթութիւնը լուսաւորում է մարդկային միտքն ու հոգին, կերտում ու ձեւաւորում անձին՝ արդի ժամանակներին եւ պահանջներին համահունչ գիտելիքներով ծառայութիւն բերելու կեանքի առաջընթացին ու բարօրութեանը։ Կրթութիւնը անհատի առջեւ բացում է աստւածճանաչողութեան ճանապարհը, միաժամանակ ազգային ու հոգեւոր անանց արժէքներով սնում ազգի արժանաւոր զաւակների, դաստիարակում գիտակից ու պատասխանատու քաղաքացիներ։
Մաղթում ենք ուժ ու կորով կրթութեան գործի բոլոր նւիրեալներին՝ իրենց պատասխանատու եւ գովարժան առաքելութեամբ սաների սրտերում ամրապնդելու ուսման հանդէպ նախանձախնդրութիւնը, զօրացնելու նրանց ազգասէր ու հայրենանւէր ոգին։ Ձեզ, սիրելի աշակերտներ եւ ուսանողներ, մաղթում ենք եռանդ ու ջանասիրութիւն, որպէսզի գիտելիքների բարի արդիւնքներով ազնիւ նպաստ բերէք մեր երկրին ու ժողովրդին եւ ուրախութիւն պատճառէք ձեր ընտանիքներին: «Իմաստութիւնը պիտի հաճելի լինի քո ականջին, սիրտդ պիտի հաճոյք գտնի գիտութեան մէջ»,- խրատում է Սուրբ Գիրքը (Առակներ 2.2):
Թող Աստւած Իր Սուրբ Աջի ամենախնամ հովանու ներքոյ խաղաղութեան մէջ պահպանի մեր հայրենիքը եւ առատապէս օրհնի ու զօրացեալ պահի աշխարհասփիւռ մեր ժողովրդին այսօր եւ միշտ. ամէն»։
