Լիլիթ Գալստեան. ««Դաշնակցութիւնն արմատախիլ անելու» յայտարարութիւնն անելիս ՔՊ-ականները հրճւանքով ծափահարում էին»

ՀՅԴ Բիւրոյի անդամ, ՀՀ ԱԺ «Հայաստան» խմբակցութեան պատգամավոր Լիլիթ Գալստեանը գրել է.

««Ի վերջոյ, մենք կը յիշենք ոչ թէ մեր թշնամիների խօսքերը, այլ մեր ընկերների լռութիւնը», Մարտին Լիւթեր Քինգ։

Յիշենք նաեւ, որ երբ եղոյեանը՝ փրփրաբերան, ԴԱՇՆԱԿՑՈՒԹԵԱՆՆ արմատախիլ անելու յայտարարութիւնն էր անում, քպ-ականները հրճւանքով ծափահարում էին։

Իսկ կը գտնւի արդեօք եւրոպական արժէքների ջատագով, ԵՄ գրանտներ ստացող իրաւապաշտպան գէթ մէկ ՀԿ, որն առանց վարանելու կարձանագրի, որ եղոյեանի եւ թիմի վարքը մաքուր ՖԱՇԻՍՏԱԿԱՆ է, այլատեացութիւն եւ մարդատեացութիւն՝ եւրոպական արժէքներին հակոտնիա։

Յետոյ մի սրտնեղէք, որ ձեզ վարձկան են ասում։ Կրկնակի ստանդարները ՆՈՂԿԱԼԻ են եւ վերջ»։

Յիշեցնենք՝ այսօր Ազգային ժողովում «Կառավարութեան կառուցւածքի եւ գործունէութեան մասին» օրէնքում փոփոխութիւններ եւ լրացումներ կատարելու՝ Կառավարութեան անդամի երդման տեքստը երկրորդ ընթերցմամբ ընդունելու մասին օրէնքի նախագծի քննարկումը վերածւեց քաղաքական բախման։ ՔՊ-ական Արման Եղոյեանն, անդրադառնալով երդման տեքստի «Յանուն Հայաստանի յարատեւութեան, անկախութեան եւ ինքնիշխանութեան» դրոյթին, քննադատութեամբ յարձակւեց ՀՅԴ-ի վրայ՝ յայտարարելով, թէ այդ նպատակների համար անհրաժեշտ է «դաշնակցականութիւնն արմատախիլ անել հայ քաղաքական մտքից» եւ յաւելեց, որ «Քրիստինէ Վարդանեանը պէտք է լինի վերջին դաշնակցականը»։

Ի պատասխան՝ Քրիստինէ Վարդանեանը նշեց. «Ինչքան էլ տարօրինակ լինի, պարո՛ն Եղոյեան, շնորհակալութիւն ձեր անկեղծութեան համար, շնորհակալութիւն ձեր դիմակները պատռելու համար, որովհետեւ դուք ինչքան պայքարէք դաշնակցականութեան եւ Դաշնակցութեան դէմ, Դաշնակցութիւնը այնքան ուժեղանալու է։ Դուք այս ամբիոնից ունեցաք բառացիօրէն եւ տառացիօրէն ֆաշիստական ելոյթ: Այո՛, ինչպէս թուրքերն էին ուզում աշխարհում թողնել մի հայ՝ այսպէս օրինակ, որ տենց բան եղել է, դուք բառացի նոյնը կրկնեցիք, բառացի։ Բայց ինչպէս թուրքերը իրենց ծրագրում չեն յաջողել, նոյնը չէք յաջողելու դուք: Ես մի տերմին եմ մտածել ձեզ համար, որը, կարծում եմ, ձեզ ամենալաւն է բնութագրում. դուք երիտբոլշեւիկներ էք: Դուք երիտբոլշեւիկներ էք, դուք ունէք նոյն թիրախները, ինչ որ երիտթուրքերը, եւ նոյն գործիքակազմը, ինչ որ բոլշեւիկեան մտածողութիւնը: Շնորհաւորում եմ, կարող էք այսուհետ ձեզ դիմել որպէս երիտբոլշեւիկներ: Եւ իրականում, գիտէք, 135 տարւայ ընթացքում որքան արմանեղոյեաններ են եղել, ձեզնից աւելի մեծ ուժեր են պայքարել Դաշնակցութեան դէմ: Փորձէ՛ք, փորձէ՛ք, կրկնում եմ, դուք դրանով միայն մեզ ուժեղացնում էք»։