Գերխնդիրը՝ նոր կորուստներն ու կենսական զիջումները բացառելն է
ՀՅԴ Բիւրոյի ուղերձը
Չարաբաստիկ 2023-ը կը մնայ մեր պատմութեան մէջ որպէս հայրենազրկման ու կորստի տարի։ Դաւադիր պայմանաւորւածութիւնների ու յանցաւոր անգործութեան արդիւնքում հայաթափւեց Արցախը, ունեցանք Հայաստանի ինքնիշխան տարածքի նոր կորուստ, հարիւրաւոր նւիրական զոհեր, խեղւած մարդկային ճակատագրեր։ Իրադարձութիւնների նման ընթացքը կանխելու ջանքը ցաւօք բաւարար չեղաւ։ Անտարբերութեան, սեփական ուժերի նկատմամբ թերահաւատութեան, պառակտւածութեան, ազգային-պետական շահերի ստորադասման արմատացած դրսեւորումները այդպէս էլ չկարողացանք յաղթահարել։ Ու դրա համար վճարեցինք շատ թանկ։
Աշխարհաքաղաքական, ռազմաքաղաքական եւ ներազգային խորքային վերափոխումների ներկայ հանգրւանում Հայաստանը եւ ողջ հայութիւնը տակաւին շարունակում են կանգնած մնալ ճգնաժամի եւ լրջագոյն մարտահրաւէրների առջեւ։ Ստեղծւած իրավիճակի յաղթահարման համար հեշտ ու արագ լուծումներ չկան։ Մենք խնդիր ունենք թէ՛ ներքին, թէ՛ արտաքին ճակատում։ Արտաքին մարտահրաւէրները հնարաւոր չի լինի յաղթահարել առանց ներքին մարտահրաւէրները յաղթահարելու։ Մեր բոլորի գերխնդիրն է՝ նոր կորուստներ ու կենսական զիջումներ, անվտանգային իրավիճակի վատթարացում թոյլ չտալը։ Այս ամէնը մենք ի զօրու ենք անել եթէ վերականգնենք հաւատը մեր ուժերի նկատմամբ ու մեր ռեսուրսների ամբողջական գոյքագրմամբ պայքարենք ու գործենք առանց յոգնելու։ Միայն այդ կերպ կարող ենք կանխել կորուստների, պարտութեան ու ազգային նւաստացման այս կործանարար ընթացքը։ Օրւայ հայրենադաւ վարչախմբի ու թուրք-ադրբեջանական տանդեմի կողմից մեզ պարտադրւող սին «խաղաղութեան» օրակարգին մենք պէտք է հակադրենք մեր ազգային-պետական շահերից բխող իրական, արժանապատիւ խաղաղութեան օրակարգը, որը կապահովի ե՛ւ Հայաստանի Հանրապետութեան տարածքային ամբողջականութիւնը, անկախութիւնն ու անվտանգութիւնը, ե՛ւ Արցախի ժողովրդի ու Հանրապետութեան իրաւունքների պաշտպանութիւնը եւ ընդհանրապէս մեր ժողովրդի բարօրութիւնը։
Արդարութեան, արժանապատւութեան եւ հաւասարութեան արժեհամակարգերի վրայ հիմնւած մրցունակ, նոր որակի ազգային պետութեան կառուցումը պէտք է հռչակւի ազգային ռազմավարական նպատակ։
Մենք հաւատում ենք մեր ժողովրդի հաւաքական իմաստութեանն ու ուժին եւ վստահ ենք, որ միասին կարողանալու ենք բեկել պատմութեան ընթացքը։
ՀՅԴ ԲԻՒՐՕ
2024 թ. յունւարի 10
