Քրիստինէ Վարդանեան. «Քաղաքականութիւնը զբաղւում է նաեւ քաղաքականութեամբ չզբաղւողներով»
ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Քրիստինէ Վարդանեանը «Ֆէյսբուք»-ի իր էջում գրել է.
«Քաղաքականութիւնը զբաղւում է նաեւ քաղաքականութեամբ չզբաղւողներով։
Շաբաթւայ դասը եւ ուղերձը յստակ էր․ ՔՊ-ի հետ բոլոր, անգամ անուղղակի, անգամ անմեղ թւացող թեմաներով համագործակցողները ծանր գին են վճարելու։
Որեւէ մէկը չի կարող կանխատեսել՝ ինքը ներիշխանական որ ինտրիգների, որ հերթական քարոզչական շոուի զոհը կը դառնայ։
Դու կարող ես լինել սփիւռքից հայրենիք լաւագոյն մղումներով վերադարձած երիտասարդ, կարող ես լինել յայտնի գործարար, կարող ես լինել առաջատար մասնագէտ, բայց եթէ որեւէ կերպ համագործակցում ես, կապ ունես այս ռեժիմի որեւէ ճիւղի հետ՝ քեզ մի օր կարող են ուղղակի շղթայակապ աշխատավայրից տանել, կարող են պառկեցնել ասֆալտին, կարող են երկար ժամանակով զրկել ազատութիւնից, որովհետեւ իշխանութեանն այդպէս է պէտք։ Պարզապէս, պէտք է եւ վերջ։
Դու այդտեղ կարող ես անգամ լրիւ անմեղ լինել, բայց մէկ է, քաւութեան նոխազը լինելու ես դու եւ երբեք ոչ իշխանութեան թիմի հաւատարիմ անդամը։
Եւ համագործակցութիւն ասելով կարելի է հասկանալ ամենատարբեր գործառոյթների իրականացումը, ծառայութիւնների մատուցումը, որոնք յաճախ այդ ծառայութիւնները մատուցողներն անւանում են՝ դէ մենք գլուխներս կախ մեր գործ ենք անում, քաղաքականութեամբ չենք զբաղւում։
Ուրեմն այս իշխանութեան հետ ցանկացած համագործակցութեան բացառումը բխում է ոչ միայն քաղաքական արդար, լրիւ հիմնաւոր դիրքորոշումից, այլ նաեւ պարզ ինքնապաշտպանութեան բնազդից»։
