Դեսպան Սոբհանին պարգեւատրւել է Բարեկամութեան շքանշանով
«ԱԼԻՔ» – ՀՀ նախագահ Վահագն Խաչատուրեանի կարգադրութեամբ, իր դիւանագիտական առաքելութիւնն աւարտած, ՀՀ-ում Իրանի Իսլամական Հանրապետութեան արտակարգ եւ լիազօր դեսպան Մեհդի Սոբհանին պարգեւատրւել է Բարեկամութեան շքանշանով:
«Հիմք ընդունելով վարչապետի միջնորդութիւնը՝ համաձայն Սահմանադրութեան 136-րդ յօդւածի եւ «Հայաստանի Հանրապետութեան պետական պարգեւների եւ պատւաւոր կոչումների մասին» օրէնքի 5.3-րդ յօդւածի 1-ին մասի.
Հայաստանի Հանրապետութեան եւ Իրանի Իսլամական Հանրապետութեան միջեւ փոխգործակցութեան խորացման, ինչպէս նաեւ հայ-իրանական բարեկամական յարաբերութիւնների ամրապնդման եւ զարգացման գործում ներդրած նշանակալի աւանդի համար Հայաստանի Հանրապետութիւնում Իրանի Իսլամական Հանրապետութեան արտակարգ եւ լիազօր դեսպան Մեհդի Սոբհանիին պարգեւատրել Բարեկամութեան շքանշանով»,- ասւած է ՀՀ նախագահի ստորագրած կարգադրութիւնում:
Նշենք նաեւ, որ իր դիւանագիտական առաքելութեան աւարտի կապակցութեամբ, դեսպան Սոբհանին հրաժեշտի հանդիպում է ունեցել ՀՀ վարչապետ Նիկոլ Փաշինեանի հետ:
Հանդիպման ժամանակ Փաշինեանը շնորհակալութիւն է յայտնել դեսպան Սոբհանիին սերտ համագործակցութեան համար եւ նշել, որ վերջին տարիներին Հայաստանի եւ Իրանի միջեւ համագործակցութիւնը բոլոր ոլորտներում բարձրացել է նոր մակարդակի: Այդ գործում նա ընդգծել է Մեհդի Սոբհանիի անձնական ներդրումը:
Մեհդի Սոբհանին իր հերթին շնորհակալութիւն է յայտնել Փաշինեանին եւ ՀՀ Կառավարութեանը ակտիւ եւ արդիւնաւէտ երկխօսութեան համար՝ ընդգծելով, որ գործունէութեան ընթացքում ներդրել է բոլոր ջանքերը՝ երկկողմ կապերի ամրապնդման համար: Դեսպանը շնորհակալութիւն է յայտնել Բարեկամութեան շքանշանով պարգեւատրելու համար եւ նշել, որ հետագայում եւս կանի ամէն ինչ՝ Իրան-Հայաստան յարաբերութիւնների խորացման ու ամրապնդման համար:
ՀՀ վարչապետը դեսպան Սոբհանիին մաղթել է յաջողութիւններ հետագայ գործունէութեան ընթացքում:
