Արաղչի. «Հիմա E3-ի հերթն է ցոյց տալու իր լրջութիւնն ու դիւանագիտութեան հանդէպ հաւատը»
«ԱԼԻՔ» – ԱԳ նախարար Սէյէդ Աբբաս Արաղչին, երէկ՝ սեպտեմբերի 17-ին հեռախօսազրոյց է ունեցել եւրոպական եռեակի՝ Մեծ Բրիտանիայի, Գերմանիայի եւ Ֆրանսիայի ԱԳ նախարարների, ինչպէս նաեւ ԵՄ արտաքին քաղաքականութեան ղեկավարի հետ: Հաղորդում է ԻՌՆԱ-ն:
Համատեղ հեռախօսազրոյցի ժամանակ, անդրադառնալով լարւածութեան աճը կանխելու համար երկխօսութեան եւ դիւանագիտութեան մթնոլորտի պահպանման կարեւորութեան վերաբերեալ Իրանի սկզբունքային դիրքորոշմանը՝ նախարար Արաղչի Անվտանգութեան խորհրդի կողմից վերացւած պատժամիջոցները վերականգնելու երեք եւրոպական երկրների քայլը համարել է զուրկ որեւէ իրաւական եւ տրամաբանական հիմնաւորումից եւ նշել է. «Իրանի Իսլամական Հանրապետութիւնը պատասխանատու մօտեցմամբ երկխօսութեան մէջ է մտել Միջազգային ատոմային էներգիայի գործակալութեան հետ, եւ մշակել է յստակ գործելաոճ՝ նոր իրավիճակում իր պարտաւորութիւնները կատարելու վերաբերեալ, եւ անհրաժեշտ է, որ բոլոր կողմերը հասկանան այս գործողութեան կարեւորութիւնն ու արժէքը»:
«Հիմա միւս կողմի (եւրոպական եռեակ-ԽՄԲ.) հերթն է օգտագործել այս հնարաւորութիւնը դիւանագիտական ուղին շարունակելու, եւ ճգնաժամը կանխելու համար, ինչպէս նաեւ՝ ցոյց տալ իր լրջութիւնն ու դիւանագիտութեան հանդէպ հաւատը»,- ընդգծել է նա՝ յսկատակեցնելով. «Իրանը պատրաստ է հասնել արդար եւ հաւասարակշռւած լուծման, որը կապահովի փոխադարձ շահերը։ Նման նպատակին հասնելը պահանջում է պատասխանատու եւ անկախ մօտեցում երեք եւրոպական երկրներից, եւ խուսափել այն խաղացողների ազդեցութիւնից, ովքեր չեն գնահատում դիւանագիտութիւնը, միջազգային իրաւունքի սկզբունքներն ու կանոնները»:
