«Լեմկին»-ի ինստիտուտ. «Արարատ լեռան անւան, զինանշանի, օրհներգի փոփոխութեան մասին յայտարարութիւնները մտահոգիչ են»

Ցեղասպանութեան կանխարգելման միջազգային ինստիտուտը Lemkin Institute for Genocide Prevention Նիկոլ Փաշինեանին կոչ է անում չնպաստել Ալիեւի կողմից առաջ քաշւող գաղափարների հիմնաւորմանը:

Այս մասին իր «Ֆէյսբուք»-եան էջում յայտնում է ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Քրիստինէ Վարդանեանը։

«Սա անօրինակ խայտառակութիւն է, երբ ոչ միայն ամբողջ ընդդիմութիւնը, այլ նաեւ արդէն միջազգային ինստիտուտը փաստում է ներկայ իշխանութեան յօգուտ Ադրբեջանի գործելը:

Փետրւարի 23-ին ինստիտուտը յայտարարութիւն է տարածել, որտեղ բառացի ասւում է.

«Հաշւի առնելով Ադրբեջանի կողմից շարունակւող սպառնալիքները՝ «Լեմկին»-ի ինստիտուտը մտահոգւած է Հայաստանի կառավարութեան վերջին գործողութիւններով։ Այս գործողութիւնները ներառում են Սահմանադրութեան մէջ առաջարկւող փոփոխութիւնները եւ մշակութային նշանակալից խորհրդանիշերի օգտագործումը, ինչպիսիք են Արարատ լեռան անունը եւ զինանշանը, ազգային օրհներգի փոփոխութիւնները եւ «Հայոց պատմութիւն» առարկայի դասաւանդման առաջարկւող փոփոխութիւնը։

Նման առաջարկները տագնապի հիմք են հանդիսանում, քանի որ դրանք կարող են ուժեղացնել նախագահ Ալիեւի ներկայիս քարոզարշաւը եւ ակամայ ամրապնդել նրա կողմից առաջ քաշւող գաղափարները»,- գրել է Քրիստինէ Վարդանեանը: